MAPKOMS Cup 2020 : Ekipa Feto Naunil Media Susesu Hakat Oitavu Finais

Naunil Media (Díli), Ekipa Futsal feto husi Naunil Media sussesu hakat ba Oitavu Finais Torneu MAPKOMS hafoin manán ekipa adversáriu uma nain MAPKOMS-B ho score 4-1 iha jogu ikus Torneu MAPKOMS grupu ‘C’.

Duelo entre Naunil Media kontra MAPKOMS-B ne’e hala’o iha kampu Futsal Bebora, Tersa (17/11).

Ekipa rua ne’e hahú halo kontra-atake ba malu desde kick off parte dahuluk, no tama ba iha minutu 4, jogadora Auxiliadora susesu lori nia ekipa Naunil lidera ho score 1-0 hafoin halo kontra atake, maka’as no guarada rede husi MAPKOMS la konsege salava bola ne’ebé saran husi jogadór Auxiliadora.

Ekipa rua ne’e maintein halo kontra ataka ba malu maibé la iha golu ruma mak akontese tan, nune’e score 1-0 nafatin to’o termina jogu parte dahuluk.

Kontinua ba jogu parte daruak, ekipa uma nain responde kedas golu ida hodi halo empata score ba 1-1 liu husi jogadora Rozalia iha minutu 12.

Score 1-1 la dura to’o kleur, tanba ekipa Naunil Media responde kedas golu ida hodi muda score ba 2-1, liu husi jogadora Dulcia ho númeru kamozola 3.

Dulcia marka tan golu ida hodi haboot liu-tan score ba 3-1 iha minutu 16, avansadu ho númeru kamizola 3 ne’e marka golu liu husi suta dook hodi lori nia ekipa Naunil lidera ho score 3-1.

Sorti aat monu ba ekipa uma nain MAPKOMS-B hafoin iha minutu ikus mosu tan handbool iha area defeza Uma nain MAPKOMS-B no árbitu deside penalti.

Suta penalidade ne’e jogadora Muky ne’ebé mak sai ezekutor ba penalidade refere sussesu fura rede MAPKOMS-B no muda score ba 4-1 to’o termina jogu parte daruak.

Vitória ba ekipa Naunil Media hodi ultrapasa ba faze oitavu finais MAPKOMS Cup 2020. Ekipa Kobertura