Kopa 12 Novembru 2020 : DIT Susesu Halakon Karketu 3-0
Naunil Media (Díli), DIT FC susesu halakon nia adversáriu Karrketu Díli ‘Matak Malirin’ ho score 3-0, husi jogu kontinuasaun Kopa 12 Novembru mak hala’o iha stadion Munisipal Díli, Tersa (18/11).
Ekipa rua hotu-hotu hatudu jogu furak iha kampu dezde inísiu jogu, ho ambisaun hanesan hodi hakat ba oitavo finais.
Iha minutu 32, kapitaun Karketu Díli faila kontrola bola no DIT aproveita hodi marka golu dahuluk liu-husi jogadór Santos hodi hatun score ba 1-0.
Kapitaun avansadu ho númeru kamizola 7 ne’e marka golu hafoin simu asistensia bola kruza husi nia kompaineru Venseslau Fatima.
Liu de’it minutu ida ka iha minutu 33, José Dos Santos, marka tan golu ida hodi muda score ba 2-0, to’o termina jogu primeira parte.
Kontinua ba jogu segunda parte ekipa rua mantein lansa kontra-atake ba malu, no tama ba iha minutu 56 Venseslau Fatima, marka golu ida hodi muda aumenta score ba 3-0.
Hela ho score 3-0 halo ekipa Matak Malirin sai hodi halo kontra atake maka’as maibé defender husi ekipa DIT la fó fatin ba ekipa Karketu hodi marka golu to’o termina jogu segunda parte vitória ba DIT FC.
Rezultadu vitória ne’e lori ekipa DIT FC hakat ba faze oitavu finais, enkuantu Karketu Díli elimina husi Kopa 12 Novembru. Dvo
