PR Lú Olo Husu Povu Ermera Koopera ho Orgaun Soberanu Estadu

Naunil Media (Ermera), Iha loron ikus vizita iha Munisípiu Ermera, Prezidente Repúblika, Francisco Guterres Lú Olo, halibur hamutuk ho komunidade Gleno, iha kalan-kultural no vizita espozisaun hodi haree produtu-lokál, artezenatu no ai-han tradisionál.

Naunil Media asesu liu-husi pájina espesiál Presidência da República Democrática de Timor-Leste, 19 Novembru 2020.

Prezidente Repúblika felisita no enkoraza grupu produtivu no joven sira ne’ebé lori sira-nia obra hatudu iha espozisaun ne’e atu kontinua sira-nia atividade no hakbiit aan hodi dezenvolveliutan sira-nia produtu.

Ba komunidade Gleno ne’ebé hakonu fatin espozisaun ne’ebé realiza iha eis Sede Administrasaun tempu okupasaun, Xefe Estadu fó hanoin fila fali objetivu nia vizita iha Munisípiu sira, hanesan mós iha Ermera.

“Uluk kampaña iha Ermera, ha’u kasu hela lia katak se eleitu Prezidente Repúblika, ha’u sei sai Prezidente ba povu tomak. Liu husi kompromisu ida ne’e, bainhira ha’u eleitu sai Prezidente Repúblika ha’u tenki fila fali ba ha’u-nia hun no abut, maka povu ida ne’e, para atu bele rona diretamente sira-nia lian halerik. Atu haree diretamente ho matan sira-nia moris ne’ebé la’o dadauk, agora”, hateten Prezidente Francisco Guterres Lú Olo.

Xefe Estadu fiar VIII Governu Konstituisionál sei kumpre saida mak liu husi Vise Primeiru Ministru José Reis no membrus Governu sira seluk, ko’alia ona ba komunidade Munisípiu Ermera, iha diálogu “Dadalia ho Lú Olo”

“Ha’u fiar katak Ermera sei koopera nafatin ho Governu, sei koopera nafatin ho Prezidente Repúblika ho mós Parlamentu (Nasionál) para ita hambriik nafatin hanesan povu ida independente i livre para buka rasik nia dalan atu moris”.

Atividade espozisaun no kompetisaun kulinária integra mós iha programa vizita Prezidente Repúblika iha kada vizita Xefe Estadu ba iha munisípiu sira hanesan dalan atu prove ai-han lokál no hakbesikliutan Prezidésia Repúblika ho sidadaun sira.

Iha kalan-kultural ne’e anunsia mós manán-na’in ba kompetisaun kulinária ne’ebé realiza husi Gabinete Apoiu Atividade Konjúje (GAAC-PR, sigla iha portugués). Ba manán-na’in sira, Espoza Prezidente Repúblika, Cidalia Nobre Guterres, ne’ebé akompaña Xefe Estadu iha vizita ne’e, entrega mós insentivu osan hodi apoiu sira-nia atividade kulinária.

Marka prezensa iha kalan-kulturál ne’e, Ministru Estatal, Miguel Carvalho no Sekretáriu Estadu Arte Kultura,Téofilo Caldas ho autoridade Munisipál Ermera ne’ebé asiste hamutuk animasaun hosi Banda Prezidénsia Repúblika no aprezentasaun dansa husi estudantes sira husi estudantes sira husi Eskola Café, Eskola Sekundáriu Hélio Pina “Mau-Kruma” no seluktan. */Pau