Rede Feto Alerta Públiku Hakribi Violensia Kontra Feto

Naunil Media (Díli), Kuarta (25/11) ne’e, Prezidente Konsellu Rede Feto iha Timor-Leste, Yasinta Lujina, husu ema hotu tenke hakribi hahalok krime viólensia hasoru feto no labarik sira tanba dala barak feto mak sempre sai vítima. 

Yasinta Lujina, ba jornalista sira iha kampaña viólensia hasoru feto no labarik, iha Tasi-Tolu.

Yasinta informa, Rede Feto inísiu kedas prontu luta no prevene feto maluk sira ne’ebé mak sai vítima tanba ne’e iha Novembru Rede Feto Timor-Leste hala’o  kampaña hakribi viólensia hasoru feto no labarik feto durante loron 16 (25 to’o 10 fulan Dezembru 2020.

“Luta kontra viólensia ba feto no labarik feto maka iha parte 2, halo prevensaun no fó asistensia ba maluk feto sira ne’ebé maka sai vítima”, dehan Yasanti.

Nia hatutan, kampaña públiku ne’e atu fó atensaun ba ema hotu-hotu oinsá hapara viólensia kontra feto no labarik feto.

“Tenke servisu hamutuk husi parte sosiedade, sosiedade sivíl no estadu iha parte 3 ne’e bainhira kolabora hamutuk mak ita fiar katak, ita bele elimina viólensia kontra feto no labarik”, Nia Subliña.

Prezidente ne’e deklara, sosiedade sivíl esforsu tuir kbiit, no servisu tuir matadalan no mekanismu rasik.

Iha sorin seluk Adjuntu Administrador Postu Administrativu Dom Aleixo Lino Pereira Da Cruz haktuir,  sente orgullu maibé husu mós parte hotu-hotu bele servisu hamutuk atu bele kombate viólensia iha aldeia, suku no nasaun.

“Agradese ba ita bo’ot (Rede Feto) sira-nia servisu, ita presija servisu hamutuk husi NGO internasionál sira, organizasaun Rede Feto. Sebele karik ita bo’ot sira servisu hamutuk ho autoridade lokál sira no igreja atu bele prevene ou konbate viólensia ne’ebé maka akontese iha iha bairu ka suku inklui mós nasaun Timor-Leste”, nia salienta.

Adjuntu administradór ne’e mós husu, ba joven mane sira liu-liu iha suku Komoro ne’ebé mak tenke foti liman hodi halo viólensia hasoru feto. Maibé husu mós ba feto sira tenke haree mós ba ema nia sala, la’ós mane de’it mak sala.

“Fó hanoin mós ba joven sira liu-liu ba ami mane  ne’ebé maka dala ruma ko’alia iha uma laran tenke foti liman hodi hasoru inan feton sira, liu-liu iha suku komoro viólensia hasoru feto ne’e makas loos, tanba ne’e maka fó hanoin mós ba feto sira la’ós buat ida ami mane mak sala hela de’it, maibé ita mós tenke hare’e ba ninia sala ne’e iha parte ne’ebé?”, Lino  esplika. Rit/emj14