Janeiru To’o Novembru 2020, FOKUPERS Rejista Kazu Viólensia Hasoru Feto 263
Naunil Media (Díli), Diretóra FOKUPERS, Maria Jóse Guterres, informa inísiu fulan Janeiru to’o Novembru 2020 , Forum Komunikasaun Ba Feto Timor Loro Sa’e (FOKUPERS) rejista kazu viólensia kontra feto no labarik totál 263 no viólensia domestika 97.
Diretóra FOKUPERS Maria Jóse Guterres ba jornalista sira iha kampaña nasionál viólensia kontra feto, iha Tasi Tolu, Kuarta (25/11).
Diretóra FOKUPERS Maria hateten, FOKUPERS hanesan membru husi Rede Feto ne’ebé mak iha dadus kona-ba violensia hasoru feto no labarik feto. Iha tinan ida ne’e FOKUPERS rejista kazu hamutuk 263.
“Husi Janeiru to’o Novembru agora ne’e totál kazu hamutuk 263, inklui mós husi viólensia domestika ba ema bo’ot 97, viólencia fíziku ba labarik feto 4, abandona husi laen 65, abandona husi namora 15, abuzu sexual ba labarik menor idade 10, viólasaun sexual ba labarik 14, kazu insestu ba labarik 18, viólasaun públiku ba labarik 5, viólasaun públiku ba ema bo’ot 10, ameasa atu oho an 4, trafiku umanu ba ema bo’ot 1, hadau malu oan 2, infantisidu 2, ameasa ka desfamasaun 2, estraga sasan 1”, Diretóra Maria relata.
Diretora ne’e Dehan, totál kazu ne’ebé mak desidi iha tribunal 10, maibé maiória sei iha prosesu nia laran, desizaun ne’ebé mak haree husi gravidade kazu feto no labarik, maibé rekupera ona husi uma mahon Díli hamutuk 71, uma mahon Díli hamutuk 81, uma mahon Maria Tapó 71, iha uma tranzitoriu Suai kaju hamutuk 76.
Ikus Nia subliña, durante ne’e establese mós uma entrada hodi halo prevensaun ba COVID-19 simu referal foun hahú husi fulan Abril no Outobru total kazu ba vítima hamutuk 61. Rit/Emj 14.
