Embaisadór Andrew : UE Apoiu Feto Sobrevivente Re-Integra iha Dezenvolvimentu Ekonómia
Naunil Media (Díli), Embaixadór Uniaun Europeia (UE) Andrew Jacobs informa, União Europea (UE) inisiativa hakarak apoiu liuliu feto sobrevivente no vítima violénsia bazeia ba jéneru (VBJ) hodi reforsa no re-integra ba iha dezenvovimentu ekonómia
Embaixadór UE Andrew Jacobs ba jornalista sira hafoin abertura bazar iha edifisiu Fokupers, Farol, Sesta (04/12).
Tuir embaixadór UE liuhusi Uniaun Europeia nia apoiu atu bele reforsa no hametin organizasaun sosiedade sivil lokál, organizasaun komunitaria liuliu sobrevivente no vítima violénsia bazeia ba jéneru (VBJ) nune’e bele promove re-integrasaun no asesu dezenvolvimentu ekonomiku.
“UE apoiu orsamentu rihun atus neen ruanulu resin lima ($ 6.25) hodi apoiu atividade ekonómia ba feto sobrevivente no vitima violensia bazeia ba jeneru,
atu reforsa hamutuk no hametin organizasaun sosiedade sivil lokal no organizasaun komunitaria hodi bele fó apoiu ba feto sobrevivente no vitima violensia nian hodi promove re-integrasaun no asesu ba dezenvolvimentu ekonomiku”, dehan Embaixador UE Andrew.
Embaixadór UE ne’e hatutan, inisiativa husi apoiu ne’e ba iha munisípiu hitu hanesan Ainaro, Baucau, Dili, Ermera, Likisa, Manufahi no Oe-kusse, implementasaun iha fulan fevereiru no sei kontinua to’o tinan 2022.
Iha fatin hanesan Diretóra Ezekutiva Fokupers Maria José Guterres hatutan, objetivu husi bazar no semináriu ida ne’e atu komemora loron 16 ativismu kampaña kontra voilénsia hasoru feto no labarik.
“Eventu ne’e nudar parte ida, ita atu komemora loron 16 ativismu kampaña kontra violénsia hasoru feto no labarik nomós sei hotu iha loron 10 Dezembru nudar loron internasional ba direitus umanus”, nia informa. Ikus nia dehan, eventu ne’e realiza husi Hivos hetan apoiu husi Uniaun Europeia no servisu hamutuk ho Asosiasaun Chega Ba Ita (Acbit) no Fokupers. Apm.
