União Europeia ho Munisípiu Díli Lansa Projetu Inisiativa Reziliensia Urbana Iha Maloa
Naunil Media (Díli), Sesta (11/12) ne’e, União Europeia hamutuk ho Munisípiu Díli lansa projetu drainajen ne’ebe hanaran “Inisiativa Reziliensia Urbana iha Maloa”, tanba kada tinan bainhira tempu udan monu rai, mota moloa sempre fó ameasa bo’ot ba komunidade sira mak hela besik iha area refere.
Projetu “Inisiativa Reziliensia Urbana iha Maloa” ne’e atu hadook komunidade sira husi risku dezastre.
Embaixadór União Europeia iha Timor-Leste, Andrew Jacobs, objetivu husi projetu ne’e atu halo jestaun ba mota Maloa, halo rezusaun ba risku dezastre no mudansa klimatika.
“Jestaun ba lixu no haforsa ekonomia local, liu-liu hasa’e konsiensia komunidade sira nian ba proteze meiu ambiente areadór mota ninian” Diplomata União Europeia ne’e hateten iha fatin lansamentu projetu.
Nia esplika, projetu ne’e nu’udar kontinuasaun projetu uluk União Europeia fó ba fundasaun São Paulo ne’ebe implementa iha Dare ho aktividade formasaun ba komunidade hodi apriende pratika agrikultura ba protesaun meiu ambiente iha foho lolon.
Projetu ne’e finansia husi União Europeia ho montante milliaun $2 no sei implementa husi NGO Mercy Corp.
Prezidente Autoridade Munisípiu Díli, Gaspar Soares, konsidera programa ne’e importante tanba bele ajuda hadook komunidade husi risku dezastre.
“Haree ba importansia husi programa ne’e, ou areas ne’ebe mak iha, tempu badak atu implementa, mak munisípiu suporta tebes programa ida ne’e no espera bele ajuda situasaun ka hadi’ak situasaun balun iha mota Maloa”. dehan prezidente autoridade ne’e. Nfm
