KJD Manufahi Apoia Ai-han Ba Uma Kain 14
Naunil Media (Manufahi), Sesta (29/01) ne’e, Komite Jestaun Dezastre Munisípiu Manufahi (KJD-MM) apoia ai-han emerjénsia ba uma kain 14 mak afetadu husi anin bo’ot iha fulan Janeiru 2021, iha Postu Administrativu Same, Munisípiu Manufahi.
Tuir Koordenador Komite Jestaun Risku Desastre Munisipiu Manufahi (KJD-MM), Elezito da Costa Maçhado, apoiu ai-han emerjénsia ba maluk vitima sira hamotuk uma 14. Kompostu husi suku Holarua hamutuk uma kain neen (6), suku Daisua uma kain lima (5), suku Grotu uma kain ida (1), Suku Babulo uma kain ida (1) no suku Betanu iha uma kain ida (1).
“Ai-han ne’ebé mak apoia ba maluk vitima sira hanesan, fos, mina, supermi, biskuat, inklui ai-han sira seluk. Materiál ba konstrusaun ami verifika hotu ona hein de’it sira-nia dokumentu kompletu, atu ami haruka ba nasionál hodi hala’o prosesu”, tenik KJD-MM, Elezito da Costa Maçhado Haktuir Eleizito ba Jornalista sira, iha postu same.
Iha fatin hanesan reprezentante vitima husi suku Holarua, Secartino hatutan,” ami sente kontente tebes ho tulun ne’ebé mak husi parte governu apoia tanba estadu mós rekoñese ami sira vitina sira ne’ebé mak afetadu husi anin bo’ot hodi halo estragus ba ami-nia uma. Nfm
