Covid-19, Espalla Iha Munisípiu Baukau Kazu Komfirmadu Na’in Rua

Naunil Media (Díli), Portavoz Kordenadór Forsa-Tarefa ba Mitigasaun Surtu Covid-19, Rui Maria de Araújo, informa Covid-19 kontinua espalla tan iha munisípiu Baukau ne’ebé hasai ona amostra hamutuk 132 no kazu komfirmadu ema na’in rua.

Kordenadór Forsa-Tarefa ba Mitigasaun Surtu Covid-19, Rui Maria de Araújo ba jornalista sira liuhusi zoom kona-ba aktualiza kazu covid-19 iha Timor-Leste, domingu (14/03).

“Amostra hirak ne’ebé foti iha loron  10 no 11 de Marsu iha Baukau, hamutuk 132. Horiseik relata ona katak 37 maka sei hein rezultadu husi laboratoriu, maibé ohin hakarak relata katak 37 ne’e negative hotu. Husi kazu konfirmadu 2 ne’ebé horiseik ralata, no mós vigilánsia sentinel, ekipa konjunta saúde rekolle amostra hamutuk 119. Husi 119 amostras, nain 4 maka pozitivu no sira ne’e hotu profisionál saúde iha Sentru Saúde Wailili”, dehan eis Primeiru Ministru Dr. Rui.

Ho nune’e, nia dehan,  iha munisípiu Baukau, iha Cluster rua ida Cluster Caibada, kazu detetadu 2 (ida iha 2 Marsu, ida horiseik, dia 13 de Marsu) no rua Cluster Sentru Saúde Wailili, Kazu detetadu 4.

“Estudante ema Baukau, n’ebé estuda Institutu Siéncias Saúde iha Dili, hela iha Aldeia Fomento 3, suku Komoro. Husi atividade buka tuir ninia kontaktu-besik maka  hetan kazu konfirmadu foun ne’ebé ohin relata ona iha Munisípiu Díli”, Nia relata.

Nia hatutan, Estudante medisina ne’ebé halo estájiu iha Hospital Referénsia Eduardo Ximenes Baukau, ne’ebé detetadu pozitivu horiseik, iha 7 de Marsu, Domingu liu bá, halo viajen husi Díli ba Baucau iha tuku 3h30 loraik, husi terminal Bekora. To’o iha Vemasse, bis ne’bé nia sa’e, hetan dezastre. Bis ne’e naran Albatroz. Hafoin, passajeiru sira hotu sa’e fali bis seluk husi Vemasse ba Baucau. Bis ida ne’e, nia la hatene naran.

Ikus nia apela, ba  populasaun ne’ebé sente-an sa’e bis rua ne’e iha loron 7  marsu husi Díli ba Baukau, inklui hira ne’e tun husi bis ne’e molok to’o Vemase ka Baukau, favor aprezenta-an iha autoridade saúde sira iha Sentru Saúde besik-liu, atu bele hetan atendimentu. Vit