Osan “Estor’’ Laiha Obriga Francisco Faan Ai-Maran, Maibé Ema La-Hola
Naunil Mídia (Dili), Relasíona ho implementasaun Serka Sanitária, ne’ebé dadaun ne’e aplika iha kapitál Dili, hodi minimiza atividade negosiu, inklúi atividade sosíal no movimentu sira, hodi fo biban ba ekipa saúde halo kontrolu ba surtu invísivel Covid-19.
Implementasaun serka sanitária, hanesan parte ida hodi hamenus transmisaun lokál Covid-19 ba povu Timor Leste. Maibé partes seluk mos fo implikasaun ba povu kbiit laek sira nia-moris.
Tuir negosiante faan ai-maran Francisco da Silva hateten husi implementasaun ne’e fo impaktu makas ba sira. Tanba durante ne’e sira la halao atividade negosiu. Nune ikus mai fo implikasaun ba sira, tanba osan atu estór ba kreditu Moris Rasik iha fulan rua nia laran laiha.
“Agora guvernu aumenta serka sanitária ne’e di’ak, ba komunidade sira ne’ebé mak iha servisu ne’e sei di’ak netik. Oinsá ho ema sira ne’ebé laservisu ne’e araska tebes’’hatete Francisco da Silva ba Naunil Mídia iha kolmera, tersa, (16/03/2021).
Nia deklara durante ne’e atividade hotu-hotu paradu maibé kada fulan sira tenki estor osan ba nain ba atividade negosiu Moris Rasik.
‘‘Fulan-fulan ne’e ami konta saida, ami barak foti osan husi fila liman Moris Rasik,durante ne’e estór mós la’o nafatin. osan na’in mai sisi hela de’it ami, katak tenke selu” nia deklara ho triste.
Negosiante ne’e halerik hodi kestiona,ukun nain sira di’ak, tanba kada fulan sira simu salariu, hodi bele sustenta sira nia-familia, maibé povu kbiit laek sira susar atu hetan rendimentu kada loron.
“Ai hirak ne’e ami hola tutan husi Hera, maibé agora dadauk bandu hotu, ami labele ba hola ho kareta tanba estadu bandu. Nune’e ai-maran hirak agora dadaun ami faan ne’e hela nia restu’’
Nia klarifika ai-maran hirak ne’ebé sira, faan gerobak ida ema hola hotu hetan, dolar haat nulu ($40), husi ne’e sira bele hetan funan barak liu loron ida hetan dolar sanulu ($10) menus liu hetan dolar tolu ($ 3).
Francisco da silva dadaun ne’e hela aldeia Namalai suku Becora, postu Cristu Rei, Munisípiu Dili.jos
