Jurista Avelino: ‘Governu Implementa SS Tenke Ho Polítika Subsidiu Alimentar’
Naunil Media (Díli), Relasíona ho implementasaun serka sanitária ne’ebé implementa ba dala rua ona. jurista Avelino Coelho sujere ba governu tenke iha polítika fó subsidiu alimentasaun ka hahán no nesesidade bázika ba populasaun sira.
Nia deklara guvernu estabelese serka sanitária, ne’e opsaun ne’ebe loos atu governu bele kontrola propagasaun pandemia Covid-19 hodi labele halo kontaminasaun. Maibé nia sujere presiza tau atensaun ba populasaun sira mak kumpri konfinamentu obrigatoriu.
“Implementasaun Serka Sanitária tenki la’o hamutuk ho polítika de subsidiu alimentar/ai-han no subsidiu ba enerjia, ba internet, ba be’e hemu no nesesidade bazika seluk tan. Katak oinsa governu bele semanalmente halo distribuisaun ai-han ba Povu hirak ne’ebé hela iha serka sanitaria”. dehan jurista ne’e ba Naunil Media liu husi Via Email, kinta(18/03/2021).
Tuir nia durante ne’e situasaun lao normal maibé iha populasaun balun mak sei terus Tanba hamlaha.
Iha biban ne’e nia husu ba guvernu tenke kria rekejitus ba ema estranjeiru ne’ebé atu tama mai Timor-Leste , presiza fó prioridade ba ema ne’ebé halo empreza mak bele tama atu nune fo serbisu ba timoroan sira iha tempu ida agora.
“Kona-ba ema husi rai seluk tama mai Timor-Leste, loloos governu hare prioridades ka klasifika entradas. Sera ke ema estranjeiru ne’e investe iha Timor-Leste, ka kria kampu trabalhu iha Timor-Leste, ka nia profesional ne’ebe servisus iha ajensias internasionais. Karik la prense rekejitus hirak ne’e ha’u hanoin ladauk oportunu,tanba dadaun ne’e serka sanitaria seidauk termina”tenik nia.jos
