Lautém Oan Distribui Nesesidade Bázika Ba Estudante Lautém 200 Iha Díli
Naunil Media (Díli), Sidadaun Lautém oan ne’e kompostu husi deputada Deputada Cidália Mesquita Ximenes, José Agostinho Siqueira ‘Xomotxo’, deputada deputada Ana Bela no inklui funsionariu Lautém ne’ebé foti inisiativa distribui nesesidade bázika ba estudante Lautém hamutuk 200 ne’ebé hela kost iha munisípiu Díli.
“Ita hotu hatene katak labarik estudante barak maka sai afetadu ba serka sanitária. Tanba ne’e, ami ho inisiativa rasik mak fó apoia ba sira husi distribuisaun nesesidade bázika nu’udar deputadu/a Lospalos hanesan ha’u, Ana Bela, José Agostinho Siqueira ‘Xomotxo’ no maluk Lospalos oan sira ne’ebé funsionariu iha Díli, mak fó apoia ba estudante kost sira husi Lautém”, deputada Cidalia Maria Mesquita ba Naunil Media, iha nia residénzia Pantai Kelapa, domingu (21/03).
Cidalia hatutan, nesesidade bázika kompostu husi foos, mina bimoli no supermi kada ema na’in ida foos kilograma (KG) 10, supermi ho mina, atu augenta estudante sira-nia nesesidade iha momentu serka sanitária.
“Entre ami deputadu na’in-tolu ne’e kada ema n’ain-ida kontribui foos karon 20, supermi dos 20 inklui mina, atu bele apoiu ba estudante sira tanba dadaun ne’e sira dook husi família”. tenik Cidalia.
Ikus nia dehan, apoia nesesidade báziku nu’udar jestu inan ida ne’ebé sempre tau matan ba oan sira husi Lautém atu kore-an husi situasaun sira ne’e. Alende apoia ba estudante Lautém oan, distribui mós ba estudante husi Oe-cusse no Ermera ne’ebé hela iha kost Díli, maibé apoia tuir kbi’it ne’ebé mak iha. jjf