SIJK Deteta tan Kazu Covid-19 foun 55, rekupera 3 no Baixa 206
Naunil Media (Díli), Portavoz Kordenadór Forsa-Tarefa ba Mitigasaun Surtu Covid-19, Rui Maria de Araújo, informa ekipa Sala Situasaun Sentru-Integraddu Jestaun Kreize (SS-CIGC- sigla Portugés) detata tan kazu Covid-19 pozitivu foun em jerál totál hamutuk na’in-55, rekupera na’in-3, kazu ativu baixa hamutuk 206.
“Kazu foun totál em jeral ohin 55, Kazu rekuperadu 3 no Kazu ativu baixa 206. Kazu nain 55 ohin, iha mane nain 23, feto nain 32. Husi ema ho idade tinan 0-14: 13, ema ho idade entre tinan 16-67: 42, ema sintomátiku 9, ema asintomátiku 46. Husi horiseik mai ohin hamutuk hotu halo 425 testes PCR”, Dehan Dr. Rui Maria de Araújo ba jornalista sira liuhusi zoom meeting, domingu (21/03).
Eis Primeiru Ministru dr. Rui fó sai, kazu Covid-19 husi Munisípiu Díli nian ohin rejista kazu foun hamutuk na’in-43. Kazu pozitivu 1, hela iha Aldeia Berbidu, Suku Becora, Posto Administrativu Cristo Rei. Pozitivu ida ne’e kontaktu-besik ho kazu konfirmadu iha cluster HNGV.
Kazu pozitivu 9, hela iha Aldeia Bidau Tokobaru 2, Suku Kulu-hun, Postu Administrativu Cristo Rei. Pozitivu hirak ne’e kontaktu-besik ho kazu iha cluster hanesan, ne’ebé anunsía horiseik, dia 20 de Marsu.
Iha kazu pozitivu 26, hela iha Aldeia 20 de Setembro, Suku Bebonuk, Postu Administrativu Dom Aleixo. Pozitivu hirak ne’e kontaktu-besik ho kazu iha cluster hanesan no kazu pozitivu 7, hela iha Aldeia Grilos, Suku Gricenfor, Postu Administrativu Nain Feto. Pozitivu hirak ne’e kontaktu-besik ho kazu husi cluster hanesan.
“Ho nune’e, kazu detetadu ka pozitivu iha Munisipiu Díli husi dia 7 de Marsu 2021, to’o ohin, 21 de Marsu de 2021, hamutuk hotu 179. Ho baze ba informasaun ne’ebé ekipa konjunta saúde nian rekolle, foku/cluster kazu pozitivu iha Dili”, Dr. Rui informa.
Kordenadór Forsa-Tarefa ba Mitigasaun Surtu Covid-19 ne’e hatutan, kazu Surtu Covid-19 husi Iha Munisipiu Baucau ohin iha kazu foun 11. Hamutuk hotu Munisipiu Baucau deteta ona kazu konfirmadu nain 19. Kazu foun hirak ne’e, hela iha Aldeia Builai, Suku Buibau, Baucau Vila. Kazu konfirmadu hirak kontaktu-besik ho kazu husi Aldeia Lamegua ne’ebé anunsia iha dia 19 de Marsu.
Enkuantu kazu Covid-19 husi iha Munisipiu Viqueque, ohin iha kazu foun 1 hamutuk kazu konfirmadu nain-4. Kazu foun ida ne’e, hela iha Aldeia Mamaluk (Beloi), Suku Karaubalu, Viqueque. Kazu konfirmadu ida ne’e kontaktu-besik ho profisionál saúde ne’ebé halo kursu pós-laboral iha UNTL ne’ebé fila husi Díli ba Viqueque iha loron 8 Marsu.
Husi dadus jerál kazu Covid-19 foun ne’ebé ohin rejista Munisípiu Díli, Baukau no Viqueque totál hamutuk na’in-55, rekupera na’in-3, kazu ativu baixa hamutuk 206.
Alende ne’e nia relata, atividade prevensaun no mitigasaun covid-19 iha munsípiu sira seluk iha RAEOA, atividade prevensaun no mitigasaun covid-19 iha munisipiu sira seluk la’o hanesan bai- bain. tuir planu Kontinjénsia Governu nian, Timor-Leste iha faze Alerta 3, ka iha Faze Mitigasaun.
Ikus nia apela, populasaun ne’ebé
saí husi Díli ba munisípiu sira seluk, entre husi loron 5 to’o 9 Marsu
madrugada, molok serka sanitária hahú tama iha vigór iha Díli, atu favor ida aprezenta-an ba autoridade saúde sira
ne’ebé besik-liu, iha imi-nia hela fatin, hodi
bele hetan atendimentu. Ba
populasaun Timor-Leste tomak, liu-liu iha Munisípiu Díli, Baukau ho Viqueque atu nafatin hakmatek, lalika sé tilun ba
lia-anin ka rumores, pratíka nafatin medida prepensaun.Ivo/Vit
