BNCTL Oferese Uma Ida ba Família Vulnerável Manuel iha Tutuluru Same

Fahe Tutan

Naunil Media (Manufahi), Sesta (25/09) ne’e, Banku Nasionál Komersiu Timor-Leste (BNCTL-Sigla Português) entrega uma ida ba família vulnerável Manuel Amaral iha aldeia Bublau, suku Tutuluru iha postu administrativu Same.  

Uma refere konstrui nia medida 6×5,50 mak kompleta ho dapur, hariís fatin, kama kulsaun inklui aramariu ida, ho fundu U$ 4.000.00 resin mai BNCTL, hodi entrega ba Manuel Amaral nu’udár família vulnerável oan husi Amelia Amaral (matebian).

Presidente Banku Nasionál Komersiu Timor-Leste-BNCTL, António Vitor, hateten uma refere apoiu ba família vulnerável senhora Amelia (matebian), tanba nia (Amelia) laiha ona, entaun entrega fali ba ninia oan mane.

“BNCTL apoiu ho montante osan rihun haat resin ($.4000), maske matebian Amelia Amaral fila ona ba iha mundu seluk, maibe nia espiritu hela nafatin hamotuk ho ita. Ami apoiu ida ne’e entrega ba nia oan mane Manuel Amaral”, tenik Presidente BNCTL, António Vitor.

António Vitor, agradese ba kolaborasaun di’ak entre BNCTL, autoridade lokal no  komunidade hodi finaliza obra ki’ik-oan no ikus mai entrega ba família vulnerável.

Iha fatin hanesan Administradór Munisípiu Manufahi, Arantes Isaac Sarmento, agradese ba konstribuisaun BNCTL no media sira nian liu husi informasaun ikua mai bele fó solusaun ba ema halerik ida ne’e. 

“Agradese ba BNCTL ho fuan bo’ot apoiu ba vulnerável sira, ida ne’e sai ai-mahon ba ema kbi`it laek sira. Agradese ba media sira ne’ebe mak durante fahe informasaun ba públiku hodi hatene problema komunidade sira, tanba jornalista sai hanesan matan ho tilun ne’ebe besik liu ba iha komunidade”, informa Prezidente Autoridade Munisipál ne’e.  

Benefisiáriu família vulnerável, Manuel Amaral, mo agradese ba BNCTL oferese ona uma, maske simples maibe bele fó ona mahon ba família.

“Agradese ho apoiu ne’ebe fó ba Mãe, ami nain rua maske ama fila ona ba mundu seluk maibe nia espiritu sei hela nafatin ho ami”. Dehan família vulnerável ne’e. Nfm

Leave a Reply

Your email address will not be published.