RONETIL: Serbisu Seguransa La’os atu Interven Servisu Jornalista
Naunil Media (Dili), Konsellu Rede Observasaun Nasionál Eleisaun Timor Leste (RONETIL) Laurentino Alves dehan seguransa labele halo intervensaun ba servisu jornalista bainhira halao kobertura. Tanba papel jornalista atu fornese informasaun ba públiku.
Laurentino Alves deklara asuntu ne’e relasiona ho intervensaun Seguransa sira nian ba jornalista sira ne’ebé mak atu halo kobertura ba aviaun Airnorth rua, horsrseik Sesta, 26/03/2021, lori ekipamentus balun hatun iha Aeroportu Internásional Nicolau Lobato.
Tuir nia loloos serbisu seguransa atu asegura siguransa laos inerven serbisu jornalista sira nian iha fatin públiku.
“Tuir ami nia pontu de vista katak tuir loloos parte Seguransa labele halo intervensaun ba jornalista sira nia servisu hodi halo kobertura, intervista no servisu seluk ne’ebe relasiona direita ho jornalista nia knar. Ha’u hanoin Ita hotu hatene media nia papel mak atu asegura no fornese informasaun ba sidadaun hotu”.dehan fundador Ronetil liu husi via whatsApp Ba Jornalista Naunil Media sabadu, (27/03/2021).
Konsellu RONETIL ne’e deklara serbisu jornalista hanesan komponente prinsipal husi média sira presiza asesu ba Fontes informasaun no objeitu laiha limitasaun, bainhira laiha violasaun ba Kode Etiku Journalismu no Media nian.
“Jornalista sira nia liberdade de asesu kualker informasaun no Fontes legal estado ka governu nian, importante asegura transparansia informasaun no akuntabilidade públiku” nia deklara.
Laurentino mós husu ba ba instituisaun relevante sira fo orientasaun servisu ba seguransa sira tenke define responsabilidade nune’e labele inpede servisu jornalista nian.
“RONETIL husu ba Instituisaun relevante atu fo orientasaun servisu ba offisial no agente Seguransa sira tenke klaru, defini lolos Seguransa sira knaar no responsabilidade, nomos tenke iha kapasidade ba atendementu publiku, nune’e Seguransa labele ba halo baralha fali servisu jornalista Sira nian”nia tenik.*jos
