SEKOMS Apela Ba Media Atu Promove “Peace Journalism” iha TL
Naunil Media (Dili) Sekretáriu Estadu ba Komunikasaun Sosiál (SECOMS sigla Portugé) Merício Juvinal dos Reis “AKARA”, husu ba media sira ne’ebé halao knaar atu promove Jornalista Ba Paz iha timor leste hodi kontribui ba dezemvolvimentu.
Akara hato’o afirmasaun hirak ne’e, ba media Gabinete SEKOMS, tersa-feira, loron 13 fulan-abril, tinan 2021, iha edifisiu SEKOMS, Palásiu Governu, Dili.
Merício Juvinal dos Reis “AKARA” hateten, iha situasaun COVID-19 no Dezastre Naturais ne’ebé mak Timor-Leste hasoru dadaun, papel media importante tebes hodi kontribui ba ambiente hakmatek.
“Iha tempu agora media presiza kontribui ba situasaun hakmatek hodi promove Dame iha ita nia Rai” dehan “AKARA”.
Ezekutivu ne’e, husu ba media sira atu evita notísia ne’ebé provokativu ne’ebe iha tendénsia halo propaganda tuir interese polítika grupu nian ne’ebé iha tendensia fahe ka sobu povu ninia unidade.
“Jornalizmu Dame importante atu hari unidade nasionál hodi bele hamutuk luta kontra COVID-19 no hamutuk rekonstrui infraestrutura ne’ebé mak hetan estraga husi inundasaun foin lalais ne’e” nia hakotu. #NLO
