Laurentino, Governu Laiha Vontade Dezenvolve, Povu TL Nia-Moris
NAUNIL MÍDIA (Díli), Observador no Fundadór Rede Observasaun Nasionál Eleisaun Timor-Leste (ronetil), Laurentino Alves konsidera guvernu laiha vontade dezenvolve nasaun ho di’ak no povu Timor-Leste nia moris di’ak.
“Espesifikamente governu iha situasaun ida ne’ebé ita hotu konsidera hanesan transformasaun ukun husi konseitu no paradigma ne’ebé laiha vontade intimu, oinsa mak bele dezenvolve nasaun Timor-Leste ne’e ho di’ak liu ba povu nia Moris di’ak”. Informa fundadór RONETIL Laurentino Alves ba Naunil Media via whatsApp, sesta (07/05).
Observador ne’e hatutan, razaun tamba iha periodu governu da ualu konstituisional ne’e akontese koligasaun hodi ukun ba dala rua, soe tempu barak liu ba oinsá mak harii plataforma politíka ida ne’ebé forte hodi kaer ukun/forma governu.
Nia dehan, seidauk haree programa saida mak guvernu implementa ona tanba antes ne’e depende de’it ba orsamentu dotasaun temporariu (DOT), no depois koligasaun Aliansa Maioria Parlamentár (AMP) iha 2019 falla iha dalan klaran.
“Emprinsipiu ita seidauk haree lolos programa saida mak governu implementa ona, tamba situasaun dependensia ba Orsamentu duo desimu, iha tinan ida primeiru depois bloku koligasaun ho naran Aliansa Maioria Parlamentar (AMP) ne’ebé kompostu husi Partido CNRT, PLP no KHUNTO forma ne’e failha iha dalan klaran iha tinan 2019”, Tenik Laurentino.
Nia dehan, depois akontese transformasaun ba strutura governu inklui mudansa ba koligasaun Partidu sira forma hodi kaer ukun, nafatin ambiente governu da ualu, maibé akontese mudansa radikal ho AMP fahe malu, hodi afeita mandatu ukun iha periodu AMP nian, nune’e PLP ho Khuntu deside sai husi koligasaun Aliansa Maioria hodi ba hamutuk fali ho Fretilin hodi kontinua mantein existensia governu da ualu ba ukun ida ne’e.
Ilus liu, nia hateten Ronetil la nota iha progresu di’ak iha dezenvolvementu estadu iha kontekstu ekonomia nasaun nian, tanba povu barak sei moris iha kondisaun mukit, sei infrenta frazil barak ne’ebé kauza husi kalamidade dezastre naturais foin lalais ne’e, kuaze iha teritoria Timor-Leste, Nia hakotu.*Jos
