PR “Lú Olo”: Istória Mak Sai Lisaun Moris Ohin Loron ba-Futuru
Naunil Media (Díli), Prezidenti Repúblika (PR) Francisco Guterres “Lú Olo” Hateten husi istória mak sai lisaun ba moris ohin loron no aban bainrua.
Asuntu ne’e hateten xefe estadu Francisco Guterres “Lú Olo” iha ninia diskursu ba lansamentu livru ho titulu “Buibere Hamri’ik Ukun Rasik An” iha Palásiu Prezidenti Nicolau Lobato Bairru Pite, kinta (10/06).
“Husi ita-nia istória rasik, mak ita bele hasai lisaun oioin ba ita-nia moris ohin loron no ba aban bainrua. Istória sura iha livru Buibere Hamriik Ukun Rasik An haree ba pasadu ida ne’ebé nakonu ho barani, determinasaun no dedikasaun, maibé ho mós halerik oioin ne’ebé sei hakanek hela sobrevivente sira”, Dehan PR “Lú Olo”.
Aman ba nasaun ne’e hatutan, livru sura istória luta barani feto sira-nian lansa iha Palásiu Prezidensial Nicolau Lobato asosia ho data importante tebes ida, iha ita-nia Luta Libertasaun Nasional levantamentu Marabia, iha 10 juñu 1980.
PR afirma Livru ne’e mai husi inisiativa Organizasaun Popular da Mulher Timor (OPMT), nu’udar organizasaun masas FRETILIN nian, maibé reflekte feto hotu-hotu ninia kontribuisaun ba luta, husi tinan 1974 to’o 1999.
Nia dehan, Líder istóriku nain lima asosia-an mós ho livru ne’e’ tanba sai autor ba prefásiu. Nunee, líder sira ne’e mós rekoñese no valoriza feto timoroan sira, nuudar parseiru luta-nain, Aleinde Prezidenti Repúblika, prefásiu hakerek mós husi líder istóriku haat tuir mai: Senhor Xanana Gusmão, Dr. José Ramos Horta, Señor General Taur Matan Ruak no Dr. Mari Alkatiri.
“Livru Buibere Hariik Ukun Rasik An iha dimensaun nasional, ho valor sosiál, polítiku, istóriku no edukasionál as tebes ba jerasaun hotu-hotu”, Katak nia.
Ho laran-ksolok tebes no orgullu bo’ot mak ha’u lansa ohin obra importante ida, laós de’it ba ita-nia feto asua’in sira, maibé ba mós ita hou-hotu, jerasaun ohin nian no aban bairua nian. *Jos
