Espoza PR, Agradese CVTL Apoiu Komunidade Hetan Dezastre Ruma

Naunil Media (Díli), Espoza Prezidenti Repúblika Cidália Lopes Nobre Mouzinho Guterres, Agradese tebes ba Cruz Vermelha de Timor-Leste (CVTL)  nia servisu, apoiu komunidade ne’ebé bainhira iha dezastre naturál ruma.

“Iha oportunidade ida ne’e, ha’u hakarak hato’o ha’u-nia agradese ba CVTL no mós ba voluntariu sira tomak, ba estrutura CVTL nian ne’ebé mak halo sira-nia servisu, liu-liu atendementu ne’ebé mak lais iha oras tolu nia laran, bele atende ona ita-nia komunidade sira ne’ebé mak hasoru dezastre naturais ida ne’e”, hateten espoza PR ba jornalista sira hafoin partisipa seremonia aniversariu Cruz Vermelha de Timor-Leste (CVTL) ba dala 21, tersa (22/06).

Nia  haktuir, Durante ne’e CVTL hala’o nia programa barak, atividade barak ne’ebé la’ós iha Díli de’it, maibé to’o mós iha  munisípiu no área rural sira.

“Iha ha’u nia vizita ida, ha’u hasoru duni voluntariu joven sira ne’ebé iha esperitu makaas tebes, hakarak kontribui atu hadia di’ak ba komunidade sira iha area rurál”, hatutan Nia”, tenik nia

Nia esplika, programa ne’ebé mak CVTL trasa ona iha tempu ne’ebá, hakarak hato’o agradesementu bo’ot tebes, ba fundadór sira ne’ebé hari’i CVTL  komesa inisiu to’o mai ohin, ho estrutura voluntariu no mós ba parseiru sira hotu, iha rai laran no husi rai li’ur ne’ebé mak fó apoiu  mai CVTL, hala’o nia atividade hodi hakman komunidade sira nian sofrementu.

 “Ha’u fiar, ha’u fó konfiansa tomak ba CVTL ninian, liuliu ba joven voluntariu sira ne’ebé mak servisu iha ne’e, katak sira-nia servisu ida ne’e sei la’o di’ak liu hodi fó apoiu ba ita-nia komunidade sira no  ha’u fiar , ha’u fó konfiansa tomak ba sira-nia serbisu”, Espoza PR nia espernasa ba CVTL.

Iha fatin hanesan  Prezidente Cruz Vermelha de Timor-Leste (CVTL), Madalena Hanjam haktuir, hare’e ba tema CVTL ne’ebé iha katak hakman sofrementu humanu no CVTL nia istória hahú kedas iha 1975 hala’o nia serbisu konflitu iha funu.

“Situasaun komesa avansa to’o tama iha  Indonesia nia tempu, Cruz Vermelha la’o hamutuk  ho Indonézia depois to’o ita independensia ita hari’i ita-nian rasik, agora 21 anos no kontinua hala’o nia servisu humanitaria liu-liu ba iha familia ne’ebé mukit liu, signifika ema ne’ebé kiak liu no vulneravel liu”, tenik nia

Nia haktuir, enkuantu hare’e ba situasaun dezenvolvimentu governu hala’o no CVTL sai hanesan ausidiu  ba  governu maibé kuandu iha lakunas nia tama kedas, ezemplu ajuda iha inundasaun, emerjensia nune’e dentru tama iha oras tolu nia laran atividade tenke la’o kedas.

“Atividade barak tebtebes ho volontariu profesional mós iha, iha atividade jerál mós iha hanesan, halo uma, dada bee, fó asistensia médika, fó asistensia enfermajen, nutrisaun no atividade seluk tan”, Nia Konta.

Nune’e membru husi CVTL hamutuk rihun rua resin, voluntariu rihun neen, ema ne’ebé servisu atus rua no nia vor ba desizaun 21. Ipe