PR “Lú Olo” Agradese Funsionariu Públiku Nia Servisu

Naunil Média (Díli), Prezidenti Repúblika Francisco Guterres “Lú Olo” hato’o agradese ba funsionariu no ajente públiku nia esforsu empeñu tomak ne’ebé servisu iha instituisaun governu no autónoma.

 Liu husi diskursu xefe estadu nian ba serimónia komemorasaun loron Comisaão Funsão Público (CFP), ne’ebé hala’o iha Salaun Comisão Nacional Eleisões (CNE), kinta (15/07).

“Ha’u aproveita okaziaun ida ne’e hodi  hato’o ha’u nia agradesimentu ba funsionáriu  no ajente públiku sira, hotu ba esforsu tomak no empeñu husi ida-idak ne’ebé servisu iha instituisaun sira ne’ebé halo parte governu no instituisaun autónoma estadu nian”, katak aman nasaun “Lú Olo”.

Xefe estadu ne’e hatutan, Prezidenti Repúblika (PR) no sidadaun hotu-hotu sei la haluha funsionariu no ajente públiku sira nia kriatividade, dedikasaun no empeñu tomak iha sira-nia knaar loron-loron.

Nia dehan, PR hein katak funsionariu no ajente públiku sira servisu efisiénsia, liu no kualidade liu husi instituisaun públika no autónoma sira no husi  funsionáriu no ajente públiku ida-idak husi ohin ba oin.

“Hein mós husi ita-bo’ot sira respeitu ba prinsípius legalidade, transparénsia no imparsialidade hanesan dalan hotu-hotu nian, atu servi di’ak liután ita-nia estadu no povu tomak”, Tenik PR “Lú Olo”.

Lú Olo mós husik hela lia menon espesiál ba dirijente sira iha administrasaun Públika, atu haree oinsá kapasita, motiva, enkoraja, no  valoriza  liután funsionáriu no ajente públiku ida-idak ne’ebé hala’o hela ninia knaar ho ezelénsia.

Tinan ida ne’e Ministériu Saúde mak hetan responsabilidade husi Komisaun Funsaun Públika hodi organiza selebrasaun ida ne’e ho nia objetivu jerál, hodi kontinua promove knaar Funsaun Públika (FP) nian, ba  dezenvolvimentu funsionáriu sira nian hodi hala’o sira-nia knaar, iha instituisaun estadu hodi servi Povu ho étika no profisionalismu, Nia enkoraja.

Tema ne’ebé Ministériu Saúde hili ba selebrasaun ida ne’e mak:

Ábitu Saudável no Vasinasaun Hasoru COVID-19, nu’udar dalan ba nova normalidade ba iha atendimentu públiku.

Tema ida ne’e lori Timor-Leste (TL), atu hanoin ba nesesidade urjente hodi promove ábitu no komportamentu sira ne’ebé halo moris saudáve. *Jos