PM Taur: Governu Preokupa Variante Delta iha NTT
Naunil Média (Díli), Primeiru Ministru (PM) Taur Matan Ruak, Informa governu preokupa liu evolusaun Covid Variante Delta iha ona Nusa Tengara Timur, Aleinde iha Austrália.
Xefí guvernu ható lia hira ne’e ba Jornalista sira hafoin sorumutuk semanal ho Prezidenti Repúblika (PR) Francisco Guterres “Lú Olo” iha Palásiu Prezidenti Nicolau Lobato Bairru Pite Kinta, (22/07).
“Governu preokupa tanba liu-liu ba evolusaun ba Variante Delta iha ita nia vizinu Indonézia, liu-liu Kupang, Atambua nomós iha ona, no ita preokupa aleinde Austrália mós iha”, dehan PM Taur
Iha biban ne’e Prezidenti Repúblika (PR) Francisco Guterres “Lú Olo” mós husu ba governu atu tau matan nafatin ba fronteira no fó atensaun ba sidadaun sira hodi prevene a’an tuir protokolu ne’ebé iha.
“Prezidente Repúblika husu para governu kontinua fó atensaun nafatin ba ita nia sidadaun sira, para prevene tuir regra sanitariu sira ne’ebé Organizasaun Mundiál Saúde (OMS), no ita nia Ministériu Saúde (MS) fó kontinua ses a’an husi moras ne’e , iha sorin seluk labele falta ba vasina ne’e dalan mesak atu ema ida-idak proteze nia a’an”,Tenik nia.
Aleinde ne’e Xefí governu mós informa durante ne’e vasina kontra pandemia Covid-19 la’o di’ak, kuaze tó ohin loron Timor-Leste (TL) simu Vasina hamutuk rihun atus haat neen nolu resin, no uza tiha ona rihun atus tolu resin espera katak tempu badak ne’e bele uza hotu.
Nune’e governu mós preve simu tan para kontinua nafatin fó vasina ba sidadaun sira, Ministéiru Saúde (MS) no komisaun interministerial haree fó prioridade liu-liu ba Díli, Bobonaro no mós Cova-Lima, RAEOA, liu-liu sira ne’ebé iha fronteira hodi proteze uluk sira antes proteze sidadaun tomak. * Jos
