Area Seida’uk Ásesu Energia Etrisidade MOP Sei Esforsu
Naunil Média (Díli), Ministru Obras Publiku (MOP), Salvador Pires, informa, sei orienta ekipa eletrisidade de Timor-leste (EDTL), tinan oin sei liga liña eletrisidade ba populasaun área rural ne’ebé seidauk asesu eletrisidade.
“Klaru ha’u, esplika ona ba EDTL halo hela esforsu ba pakote dahuluk nian iha fulan juñu ne’e, no segundu pakote ne’e iha agostu ho setembru nian laran, ne’ebé ita bo’ot sira hein de’it ba sira ne’ebé elektrisidade seidauk tama apejar ba aldeia sira ne’ebé seidauk tama ho espera katak, iha tinan oin EDTL esforsu para bele abranje liu-tan kobertura ba área sira ne’ebé seidauk tama ida ne’e maka ita esforsu”, dehan MOP salvador pires ba jornalista sira iha Palasio Governu, kuartal,(11/08).
Ministru hatutan, populasaun iha Suku Ilat-laun, Postu administrativu Bobonaru, Munisipiu Bobonaru, ne’ebé preokupa tebes to’o ohin loron seidauk sente ukun-na, tanba durante ne’e governu la tau matan ba sira nune’e sira konsidera nafatin moris iha nakukun laran.
Iha sorin seluk Xefe suku Ilat-laun Juvinal Pires Amaral hateten , desde okupasaun Indonezia nia tempu mai to’o ukun an populasaun Sira iha suku ne’e rasik, seidauk senti eletrisidade nia naroman iha tempu kalan. Maske autoridade lokal suku ne’e hato’o ona proposta ba governu liu-husi Ministériu obras publikas, atu bele responde ba preokupasaun komunidade sira nian ne’e, maibé to’o ohin loron seidauk sente nafatin ahi nia naroman hanesan iha fatin seluk.
“Hau hanoin ko’alia kona-ba eletresidade deste Ita hetan ukun rasik an suku Ilat-laun seidauk asesu ba eletresidade. Ha’u nia mandatu nu’udar Xefe suku halo proposta haruka ona ba, maibé bazeia ba desizaun Governu nian planu ne’ebé resposta katak iha tinan 2020 ne’e atu responde kona-ba eletrisidade no lakonsege iha tinan 2021 bele responde, maibé to’o agora seidauk, iha komunidade foin uma kain tolu-nulu-resin maka asesu ba enerjia elektrisidade.
Tanba ne’e, nu’udar autoridade lokal hamutuk ho komunidade sira nafatin ejije ba ukun na’in sira atu bele tau atensaun, nune’e bele sente naroman hanesan iha fatin seluk”, responsável Suku Ilat-laun deklara.
Enkuantu komunidade sira ne’ebé seidauk asesu ba elekteisidade ne’e lokaliza iha suku Ilat-laun, Postu Administrativo Bobonaro, Munisipiu Bobonaro, total uma kain hamutuk 409 no populasaun hamutuk 2049 kompostu husi aldeia tolu maka Ilat-laun, Tuneru, Purugua. Ana
