POLRI Entrega Membru Gam PSHT Nain 352 Ba UPF
Naunil Média (Bobonaro), Polisia Republik Indonesia kaptura Membru grupu Arte Marsiais PSHT husi Timor-Leste ne’ebé ultrapasa iha dalan ilegal, imigrasaun ho POLRI entrega direitamente sidadaun sira ne’e ba Unidade Patrollamentu Fronteira (UPF).
Tuir komandante UPF Superintendente Polisia Euclides Belo hateten, dadaun Nasaun viziñu liu-husi imigrasaun no Kapoldres Indonesia kaptura sidadaun Timor-oan ne’ebé envolve an iha grupu arte marsiais PSHT hamutuk ema nain 352, tanba atraveza liu-husi dalan ilegal ba graduasaun ou (Sae Sabuk) iha indonesia.
“Ohin ami simu ita-nia sidadaun sira iha indonesia nia rai, tanba liu-husi imigrasaun, UPF no PNTL garante seguransa nune’e mós ami kumpre regra no prosedimentu protokolu ne’ebé agora estabelese hela iha ita-nia rain,” dehan Komandante UPF Euclides ba jornalista iha Fronteira Mota-ain Bobonaru, kinta, (19/08).
Nia esplika, parte imigrasaun halo ona verifikasaun ba sidadaun sira-nia identidade, antes atu kumpri protokolu saúde husi Ministériu da Saúde.
“iha Parte imigrasaun halo ona verifikasaun ba sira-nia identidade, maibé sira ne’e hotu UPF sei entrega ba sala situasaun Sentru Integradu Jestaun Krize central, depois transporta ba Dili hatama iha kuarentina ne’ebé sala situasaun prepara ona”, komandante esplika.
Euclides informa, komandu Polisia Nasionál Timor-Leste liu-husi Unidade Patrollamentu Fronteira (UPF), servisu no kordenada ho parte liña fronteira, espesialmente Sentru integradu Mota-ain, atu sira servisu hamutuk.
Iha fatin hanesan, Segundu Adjuntu Operasaun Estadu Maior Koordenador Sala Situasaun Superintendente Marcos Siqueira Nunes hatutan, sidadaun sira ne’e koopera ho seguransa no parte Saúde atu bele kumpri regras ne’ebé maka husi MS. Entaun sidadaun sira ne’e sei lori ba Dili atu bele fahe ba fatin kuarentina sira ne’ebé maka Governu prepara ona
“Sira ne’e sei lori ba Kuarentina iha Dili, atu koloka iha Hotél ne’ebé depois maka kontaktu ba parte relevante. Loloos atu lori sira ne’e ba iha Maliana, maibé fatin limitadu entaun tenke lori ba Dili. Ita nafatin hare’e no kontrala sira, maibé importante maka sira tenke kumpre saida maka parte saúde haruka ona, tanba ne’e, seguransa sei la husik membru GAM atu halo tuir sira nia hakarak no sira mós ohin hatan ona atu koopera ho parte saúde bainhira hela iha kuarentina,” segundu adjunto ne’e realsa.
Entretantu, tuir observasaun jornalista Naunil Media nia iha terenu nota katak, iha membru GAM ne’ebé ba sae sintu iha indonesia, maioria joventude feto-mane, ferik-katuas, Xefe aldeia nain ida husi Balibo, profosor EBF ida ho inisial AP husi Bobonaru Odelgomon no Polisia ajente Xefe ida nia oan nain ida husi Liquiça, inklui mós Veteranus oitu a katorze (8 a 14) nain ida ho inisial BG ne’ebe simu osan veteranus iha tinan 2018 husi Munisipiu Bobonaru. Ana
