HORTA Apoiu PNTL Ho F-FDTL Iha Liña Fronteira, Agradese TNI Nia Servisu

Naunil Media (Díli), Laureadu Nobel da Paz Jose Ramos Horta, fó apoiu ba Polisia Nasionál Timor-Leste (PNTL) no Falintil-Forsa Defeza Timor-Leste(F-FDTL), ne’ebé iha liña frente no agradese ba Tentara Nasional Indonezia (TNI) nia servisu, tanba bele deteta Timor-oan ne’ebé viola Lei.

“Ohin ha’u mai atu fó apoiu moral ba Vise-Ministru Interior hanesan mós ita-nia oan sira ne’ebé loro-loron buka implementa desijaun estadu nian, para ema labele tama sai arbiru husi ita-nia fronteira sira ne’e. Ita hatene papél Ministériu Interior, PNTL ho F-FDTL nian maka implementa lei estadu emerjensia ba Covid-19 ne’e.

Tanba ne’e, maka ha’u mai para rona di’ak liu-tan husi Vise-Ministru Interior kona-ba atividade PNTL nian, halo kontrola iha fronteira, Covid-19 variante delta ne’e la mai husi aviaun,maibé mai husi fronteira terestre ne’ebé dau-daun ne’e, tama ona iha uma laran”, dehan Ramos Horta,iha Ministériu Interior, Vila-Verde, Tersa 07/09.

Eis prezidente Repúblika hatutan, bainhira estadu lakontrola fronteira maka fó impaktu bo’ot, entaun nia fó apoiu ba servisu parte seguransa ne’ebé iha liña frente nomós fó agreade ba TNI nia servisu.

“Kuandu estadu ida la konsege kontrola nia fronteira ne’e, impaktu bo’ot ba ita-nia dezeñu sira ne’e. Entaun ha’u fó apoiu 100 % ba asaun ne’ebé ita-nia forsa F-FDTL no PNTL halo iha fronteira ne’e.

Ha’u mós agradese mós ba TNI no autoridade sira iha Indonezia ne’ebé deteta no prende elementu Timor-oan sira ne’ebé viola lei migrasaun soberania Indonezia nian. ”, eis Presidente esplika.

Ramos Horta akresenta, Iha failansu balun nia rasik  lahatene tanbasá to’o agora Prokurador Jeral Republika no autoridade sira seluk la tane Polisia nia atividade sira ne’e? Se maka viola lei estadu emerjensia, lei migrasaun, lei seguransa Nasional ne’e, matéria ona ba Prokurador Jerál Repúblika no Tribunál nian.

Ho asaun ne’ebé instituisaun arte marsial ka se deit maka viola lei no soberania Estadu rua Timor-Leste no Indonezia tenke bandu sira-nia atividade taka odamatan tanba Governu halo uluk tiha ona.

Horta realsa, kona-ba Polítika Governu atu koloka tan forsa iha fronteira ho situasaun ida pandemia nia laran, presija tebes apoiu maka’as husi F-FDTL iha implementasaun estadu emerjensia nia laran.

“Iha Instituisaun rua PNTL ho F-FDTL, ita hatene tempu Nasoens Unidas apoiu restaurasaun independensia, PNTL maka halo jestaun fronteira. Maibé  ita-nia situasaun ita tuir kedas parte ida tradisaun PNTL maka kaer mas ho kolaborasaun institusional husi F-FDTL, tanba ne’e situasaun mós ejiji F-FDTL mós fó apoiu makaas iha implementasaun estadu emerjensia, prevene violasaun ita-nia soberania husi grupu ilegais sira”, nia hato’o. Ana