CNRT Konsidera Governu Preukupa Servisu Saúde Ba Covid-19, Haluhan Tiha Setor Hotu-Hotu
Naunil Media (Díli), Bankada Congresso Nacional de Reconstrução de Timorense (CNRT), reprezentante povo iha Parlmanetu Nasionál preokupa ba Ministériu hotu-hotu, tanba oras ne’e konsentra de’it COVID-19, maibé haluhan tiha setor seluk.
“Bankada CNRT konsidera katak, iha tinan-rua ikus ne’e, kuaze Ministériu hotu-hotu, Governu nian preokupa de’it ba servisu saúde hodi hare’e ba COVID-19 no haluhan tiha setór sira seluk. Iha abertura sesaun lejizlativa da-haat husi lejislatura da-lima, Parlamentu Nasionál aprova fundu COVID-19 besik millaun $287,6, maibé Governu la konsege trava propagasaun COVID-19 nian.
Governu uza razaun movimentu livre ho kartaun kinur atu enkoraja sidadaun sira simu vasina, maibé mezmu hanesan ne’e, bainhira aplika konfinamentu obrigatóriu Governu limita hotu movimentu povu nian inklui sira-ne’ebé simu ona vasina dala-rua,”dehan deputada Virgínia Ana belo, iha sala plenaria PN, Kuarta, (15/09).
Deputada Bankada CNRT hatutan, desizaun Governu nian ne’ebé kontinua husik aviaun tama sai nafatin Timor-Leste hodi permite ukun na’in ho nia família sira halo viajen ba rai-li’ur, regra sira husi Organizasaun Mundial Saúde (OMS) ne’ebé subliña katak, sidadaun hotu-hotu ne’ebé tama ka sai husi Nasaun ida ba nasaun seluk, mezmu simu ona vasina dala-rua tenke halo auto-kuarentena tanba períodu inkubasaun virus COVID-19 no variante sira maka loron 14, liu-liu variante Delta ne’ebé daet lais liu no perigu liu iha momentu ida-ne’e.
“Iha Timor-Leste, Governante ho ukun-na’in sira ho nia família la halo auto-kuarentena, se nune’e regra sira ne’e sei serve atu aplika iha Timor-Leste ka lae? iha lójika ka lae bainhira ita sulan no limita povu atu labele halo movimentu husi Munisípiu ida ba munisípiu seluk? enkuantu ita permite ema bele tama sai iha Timor-Leste? Será ké COVID-19 ne’e tranzmite iha Timor-Leste laran de’it no livre iha Nasaun seluk,” Deputada informa. Ana
