MSSI-ISS 29 Asina Akordu Implementasaun Programa Sosial
Naunil Media (Díli), Kinta (12/05) ne’e, Governu konstituisaun da-ualu liu husi Ministériu Solidariedade Sosial no Inkluzaun (MSSI) asina assina akordu ho Instituisaun Solidariedade Sosial (ISS) hamutuk ruanulu resin sia (29), ho objetivu ba implementasaun programa servisu social.
Hafoin selebra asina akordu refere iha Salaun MSSI Kaikoli, Ministra Solidariedade Sosial no Inkluzaun núdar mos Primeira Ministra, Armanda Berta dos Santos, hateten intedementu ho instituisaun parseiria sira núdar kontinuasaun programa mak durante ne’e la’o tiha ona.
“Kada tinan Misteriu Solidariedade Sosial no Inkluzaun sempre halo akordu ho instituisaun sira hamutuk 29 tuir orsamentu ne’ebe preve kada tinan. Instituisaun Solidariedade Sosial sira benefisiaria hanesan Uma Mahon, FOKUPERS no Sentru Komunitária”, informa Governante ne’e.
Nia dehan, instituisaun sira iha duni responsabilidade atu halo atendimentu ba sidadaun sira, tuir ida-idak nia manual planu asaun no programa ne’ebe iha tiha ona.
“Ministeriu Solidariedade Sosial sempre fo apoiu ba instituisaun sira, tanba Governu mesak sei labele halo buat ida, parseiru sira atu halo atendimentu ba ema sira ne’ebe presija hanesan kbiit laek, enkuantu orsamentu preve ba Instituisaun Solidariedade Sosial hamutuk 1 millaun”, tenik Ministra ne’e.
Iha fatin hanesan, Responsável Fundasaun Lar Santa Terezinha Quelicai, Pe. Marianto Adirson António Aderado, informa orsamentu kiik kompara ho tinan kotuk, nune’e propriu aloka ba buat importante, inklui salariu staff no alimentasaun.
“Ohin Ministra dehan hetan redusaun tanba problema orsamentu, maske defikuldade maibe ami nia instituisaun Fundasaun Lar Santa Terezinha Quelicai koko no fiar katak sei ajuda teb-tebes alin sira iha instituisaun”, haktuir Pe. Marianto.
Na’i lulik ne’e informa liu-tan, programa prinsipal atu fo formasaun integradu ba labarik sira, tantu espiritual no formasaun humanu.
“Hau agradese teb-tebes ba apoiu tomak husi parte estadu liu husi Ministeriu Solidariedade Sosial. Tinan ida ne’e nian ami hetan osan kiik husi estadu hamutuk trinta e dois mill virgula nove centos quarenta e quatro (U$ 32,944)”, relata Pe. Marianto.
Ikus-nia iha esperansa ba futuru sei halo atendimentu di’ak ba sidadaun sira, liu-liu kbiit laek. Mj1/Mj2/Mj3
