PNTL Kaptura Joven Nain 1 Transaksaun Ilegál Sasan Kultura Timor
Naunil Media (Bobonaro), Komandu polisia Nasionál Timor-Leste (PNTL), liu-husi Unidade Patrullamentu Fronteira (UPF) Kompañia Alfa Maliana, kaptura sidadaun Timor-oan mane na’in-1 ho naran inisial AG, idade 26, iha fronteira terestre entre Indonezia no Timor-Leste, tanba halo transaksaun ilegál belak mean no belak mutin tama mai Timor.
Tuir komadante Unidade Patrullamentu Fronteira (UPF) Superintidente Euclides Belo hateten, UPF kaptura liu-husi operasaun rutina iha tuku 9:40 kalan, tanba halo transaksaun ilegal.
“Sidadaun ne’e UPF kaptura liu-husi operasaun rutina iha fronteira terrestre Timor-Leste ho Indonézia, horikalan iha tuku 9:40 ita- nia UPF kompañia Alfa, Postu Mozon servisu konjunta konsege kaptura ita-nia sidadaun Timor-oan mane nain 1 ho naran inisial AG ho idade 26, husi Munisipiu Bobonaro, ne’ebé halo transaksaun ilegál ba sasan kultural Timor nian, hanesan Belak hamutuk 827, belak mean iha 425 no belak mutin 402”, dehan Euclides Belo, liu-husi via telefone, sabadu, (18/09).
Komadante hatutan, sasan kultura sira ne’e, asegura ona iha Komandu PNTL hodi prosesa ba Ministériu Públiku, maibé sidadaun ne’e rasik tenke kumpri protokulu saúde hodi kumpri kuarentina.
“Belak sira ne’e halo ona auto aprensaun no asegura ona iha Komandu PNTL Munisipiu Bobonaro hodi Prosesa kontinuasaun ba iha Ministeriu Publiku. Agora dau-daun ita halo ona medida hodi prosesa tuir prosedementu legál no evakua ona sidadaun ne’e ba ekipa saude hodi kumpri protokolu saúde nian halo teste restreiu no kumpri kuarentena durante semana rua iha Maliana”, nia Relata.
Euclides akresenta, oras ne’e membru UPF nafatin halo vizilansia makaas iha fronteira hodi kontribui ba seguransa públika nune’e bele halo prevensaun hodi garante liña fronteira sai fatin seguru ba ema hotu. Ana
