PR: Ma’Huno Ema Ida Pasensia no Forte

Naunil Media (Dili), Prezidenti Repúblika (PR), Francisco Guterres “Lú Olo” hateten  Ma’Huno ema ida pasiensia la halimar no forte tebe-tebes iha rezisténsia hasoru okupsaun Indonéziu.

Chefe estadu ható lia hirak ne’e ba jornalista bainhira presta omenajen ikus ba saudozu Ma’Huno Bulerek Karathayano iha edifísiu Arquivo e Museu da Resistência Timorense, Domingo (26/09).

“Ma’Huno ema ida pasiésia la halimar, maibé ida que duru, forte tebetebes, bainhira hamutuk ho ami iha rezisténsia armada, nia hatene haraik-an”, dehan Chefe estadu

PR hateten Timor-Leste lakon lider bo’ot ida, Ma’Huno Bulerek Karathayano, hola parte iha istória  luta libertasaun Patria, nu’udar Fundadór ASDT, membru Comite Central Fretilin, Chefe Conselho Político Militár Frente Armada, Secretário da Comissão Diretiva da Fretilin, Comandante das FALINTIL, Secretario Região 3, lider ida ne’ebé besik tebes no sai inspira ba foin-sa’e klandestina. Maske hasoru situasaun difísil, Ma’Huno kontinua hakat ba oin  ho determinasaun no korajen hanesan lider.

“Lú Olo” esplika bainhira militár Indonézia kaer Komandante Superior Luta Xanana Gusmão, iha 1992, Ma’Huno asume lideransa rezisténsia nian no kontinua funu”, Esplika PR.

Aman ba nasaun ne’e hatutan,  Militár Indonézia kaer Ma’Huno iha 1993 no hatama ba kadeia, Fizikamente hetan kastigu maibé nia espíritu nasionalista nian kontinua moris buras. Bainhira sai husi prizaun kontinua luta ba independénsia Timor-Leste nian.

Iha biban ne’e Prezidente Repúblika lori povu tomak nia naran, no nia naran rasik ho família hato’o votus de pesar ba família sira hotu, Povu hotu-hotu ne’ebé sente lakon lider boot ne’e.

“Ha’u lakon kompañeru da luta ida ne’ebé terus hamutuk ho ami, ne’e triste boot ida.  Ita sente orgullu tanba Ma’Huno Bulerek Karathayano konsege duni kumpre nia misaun boot hamutuk ho ami iha ai-laran to’o libertasaun da pátria,” hateten aman ba nasaun

Nia hateten Jerasaun fundadór nasaun ne’e nian ne’ebé ida-idak hahú husik mundu. PrezidentI Repúblika hateten lideransa istóriku sira bele hamutuk hateke ba Timor-Leste nia futuru.

Prezidente Repúblika mós husu atu ba oin hotu-hotu halo esforsu garante tranzisaun seguru, liu-liu relasiona ho saida mak sei entrega ba joven sira atu kontinua obra rezisténsia ninian.

“Ma’Huno nu’udar jerasaun fundadór husik ona ita. Triste tebes tanba ita lakon ita-nia lider bo’ot ida.  Maibé ita hotu sei la haluha katak  nia husik memória ba  ita-nia  Timor-Leste livre no independente. Ma’Huno nia obra sei hela rohan-laek bainhira valor no prinsípiu luta nian kontinua buras hamutuk ho ita, iha ita-nia moris loroloron ninian,” PR husu

José António Gomes da Costa Ma’Huno Bulerek Karathayano moris iha 14 Abril 1949, Iha 24 setembru 2021 no iss kotu iha Hospital Nasionál Guido Valadares (HNGV) tanba ho moras stroke. *Jos