KNMM Husu PR Valoriza Luta Libertasaun Pátria
Naunil Média (Dili), Konsellu Nasionál Movimentu Maubere husu ba Prezidente da Republika atu fo Valorizasaun ba luta libertasaun da pátria, husu inklina Matéria sidadania iha edukasaun.
Lia hirak ne’e hato’o Frente klandestina Amaro Duarte da Conseição “Fitun Lorosa’e” ba Jornalista sira, bainhira remata hasoru malu ho Prezidente Repúblika (PR), Francisco Guterres Lú-Olo iha palásiu Prezidente Nicolau Lobato Bairru Pite, Tersa, (19/10).
“Ami husi KNMM hato’o ba PR, tuir ami nia hanoin oinsá mak fó valorizasaun ba ita nia luta libertasaun pátria ida ne’e, mak asuntu importante ne’ebé mak ami foin hato’o ba PR “, Dehan Amaro Duarte da Conseição
Nia hatutan iha parte seluk oinsá mak materia edukasaun sidadania ninian ne’e ba oan sira para fo valor ba historia luta ida ne’e dignifika ho di’ak.
Amaro haktuir tan, tanba kuandu jerasaun sira ne’e mak lahatene historia funu, lakoñese aman sira ne’ebé sai libertador ba rai ida ne’e, entaun ne’e ladún di’ak, tanba ne’e mak sira mai hato’o ba PR.
Iha enkontru ne’e PR mós apresia no toma konsiderasaun ba asuntu hirak ne’ebé sira hato’o ba.*Jos
