Lere, Max Sthall Bele Mate, Maibe Ninia Istoria Sei La Lakon iha Timor Nia Fuan
Lere, Max Sthall Bele Mate, Maibe Ninia Istoria Sei La Lakon iha Timor Nia Fuan
Naunil Media (Dili), Iha loron Kinta Feira (28/10) dadersan povu Timor-Leste simu novidades triste ida katak, jornalista Max Sthall ne’ebe halo filmajen konaba Masakra Santa Cruz hakotu ona ninian peregrinasaun iha mundu.
Nunee, Xefi Estadu Maior Jeral Falentil-Forsa Defeza Timor-Leste (F-FDTL), Tenente Jeneral Lere Anan Timur hateten, maske Jornalista Max Sthall bele mate, maibe ninian memoria sei lalakon iha Timor nian fuan.
“Ohin dader hau simu informasaun dehan ita nian Jornalista Max Sthall mate, eh… nia mate ona, maibe ninian isin mak lakon, mais ninian istoria lalakon iha Timor nian memoria, la lakon iha Timor nian fuan,” Dehan Lere Anan Timur, ba Jornalista ho triste iha Kuartel Jeneral F-FDTL, Fatuhada-Dili (28/10).
Nia hatutan, Max Sthall mak halo filmajen konaba masakre santa cruz ka 12 de Novembru hodi loke mundu nian matan katak Timor luta duni ba Ukun Rasik-An.
Enkuantu konabá Max Sthall nian mate atu hakohi iha loron 12 de Novembru, Lere dehan, ida nee depende fila fali ba desizaun guverno nian.
Jornalista Max Sthall nudar sidadaun Inglatera no Timor-Leste neebe grava akontesementu 12 de Novembru iha tinan 1991 hakotu iis iha Ospital Brisbane-Australia tanba sofre moras ho tempu naruk laran.
Estadu Timor konsideira Max Sthall nudar eroi Nasional hodi kondekora ho Grau Colar Ordem Timor-Leste.
Entertantu, Max Sthall moris iha Inglatera iha loron 6 fulan Dezembru 1954. LTS
