PN-Governu Debate Proposta Lei OJE 2022 Espesialidade
Naunil Média (Díli), Segunda ohin (6/12), iha Uma Fukun Parlamentu Nasionál (PN) ho Governu Konstituisional Da-Walu, Debate proposta lei Orsamentu Jerál Estadu (OJE), 2022 iha faze espesialidade no proposta da Lei n°.35/V (4a).
Ajenda diskusaun lei orsamentál ne’e iha tuku 9:00 dader ne’e, Debate espesialidade ne’e sei termina iha loron 17 Dezembru ne’e.
Antes ne’e, PN halo ona diskusaun proposta lei OJE 2022, Termina ona faze jeneralidade iha loron 03 dezembru ne’e.
Tuir fali Rejimentu Parlamentu Nasionál (RPN) artigu 167.° (Diskusaun no votasaun iha espesialidade), Iha alinea 1, hateten debate iha espesialidade kona-ba proposta lei planu no OJEnian labele liu loron 10, no organiza ho maneira atu bele diskute, tui-tuir malu.
Ho orsamentu hosi Ministériu no Membru Governu ida-idak intervén iha ne’e.
Nune’e mos iha alínea 2 hateten, Debate iha espesialidade ba proposta lei planu no OJE nian halo iha plenária.
Iha RPN artigu 168.° (Votasaun finál global) aprova tiha ona iha espesialidade ba proposta lei sira submete ba votasaun finál globál.
Iha OJE 2022 preve biliaun $1,675, husi montante ne’e millaun $233 ba saláriu no vensimentu, millaun $449,98 ba bens servisu, millaun $565,9 ba transferénsia públika, millaun $24,4 koresponde ba kapitál menór no millaun $401,7 ba kapitál dezenvolvimentu.
Iha planu anuál Governu nian 2022 reflete kontinuasaun servisu reforsa jestaun finansa públika ne’ebé susesivu Governu nian.
Liu husi roteiru orsamentasaun kada programa, Bazea ba livru 2 planu anual OJE 2022 integra programa hamutuk 45, sub-programa 477 no totál atividade 2,445.
Iha OJE 2022 fahe iha kategoria sira ba investimentu esensiál neen (6), millaun $226,5 ka 13,5% ba Dezenvolvimentu Kapitál Umanu (Edukasaun, Formasaun no Saúde), millaun $387,3 ka 23,1% ba programa Abitasaun no Inkluzaun Sosiál.
Ho Millaun $345,9 ka 20,7% ba iha setór produtivu sira (Agrikultura no Turizmu), Ambiente no Konetividade, dezenvolvimentu setór privadu hetan alokasaun millaun $78,6 ka 4,7%, no dezenvolvimentu rurál no kooperativa, millaun $72,2 ka 4,3% no governasaun di’ak, millaun $116,3 reprezenta 6,9% husi OJE 2022.
Iha Kuadru planeamentu kona-ba orsamentasaun kada programa bazea ba Planu Estratéjiku Dezenvolvimentu (PED) 2011-2030 no Objetivu Dezenvolvimentu Sustentável (ODS) 2030, hanesan dokumentu estratéjiku no dokumentu polítiku.Ana
