Espoza PR Agradese Madre Carmelitas Maubara Loke Orfonatu Ba Oan-Kiak

Naunil Media (Maubara), Espoza Prezidente Repúblika Cidalia Mauzinho Nobre Lopez Guterres, Agradese ba Madre Carmelita sira ne’ebé loke Orfonatu hodi simu oan kiak sira ne’ebé inan aman laiha kbiit hodi halibur no eduka sira.

Espoza xefí estadu ható lia hirak ne’e liu husi diskursu bainhira hala’o vizita ba iha Orfonatu Santa Terezhina do Menino de Jesus Maubara, Kinta (16/12).

“Ha’u agradese ba Madre sira ne’ebé mak loke fatin ida ne’e, hodi simu ita nia alin oan sira ne’ebé mak lakon inan aman, ne’ebé mak família latau matan, no sira ne’ebé mak inan aman bele iha maibé laiha kbiit atu haree, alin oan sira entaun Madre sira kongregasaun ida ne’e simu ita nai alin oan sira hodi mai iha ne’e, la’ós de’it atu halibur sira maibé oinsá mós atu eduka sira liu husi fó apoiu ba isin nian no mós ba klamar nian”, Dehan Espoza PR.

Espoza hatutan, Misaun ne’e sagrada tebes nu’udar inan hanesan mós sarani, halo Asaun solidaridade no la’ós haree de’it ba sasán, maibé atu lori sentidu hanesan Maromak oan buka halo di’ak.

“Ha’u hanoin katak misaun ida ne’e misaun sagrada tebe-tebes, hanesan sarani no hanesan inan ida ne’ebé halo Asaun solidaridade, no solidaridade la’ós de’it ita haree husi sasán ne’ebé mak ita lori ne’e, maibé ita nia sentidu hanesan ema hanesan Maromak nia oan, ita sempre halo no ita buka halo di’ak antes ita haksolok”, Tenik inan ba nasaun.

Iha fatin hanesan diretora Orfonatu Santa Terezhina do Menino de Jesus Maria Mendes mós agradese ba Espoza Prezidente Repúblika, ne’ebé tó duni iha sira nia fatin antes ne’e laespera atu hetan vizita sira hanesan ne’e.

“Ami mós hakarak agradese ba Espoza Prezidente Repúblika Timor-Leste ne’ebé tó duni ami nia fatin, ami la espera katak tó iha ne’e, maibé ohin iha ami nia fatin ne’e ami agradese no ami nia labarik kiik oan sira mós agradese tebes”, Tenik Madre diretora

Diretora Orfonatu ne’e hatutan, Estudante sira ne’ebé hela iha asrama refere hamutuk 23, maibé balun dadaun ne’e sei halo ferias no estudante ne’ebé família lamai hasoru mak sei hela iha asrama.

Nia dehan, Orfonatu refere hahú eskola husi pre-primaria tó pre-sekundária depois kontinua sekundária ba Díli hotu tiha mak sira iha kbiit hakarak atu kontinua Madre sira sei fó apoiu, maibé sira ne’ebé la kontinua ona sira sei fila fali ba nia família.

Iha vizita ne’e Espoza Prezidente Repúblika mós apoiu nesesidade bázika ba Orfonatu refere mak hanesan, Foos, Supermi, manu tolun, Mina no mós nesesidade sira seluk. *Jos