Lu-Olo: Promulga Dekretu-Lei Subsidiu Ba Profesionais KS

Naunil Media (Dili) Prezidente Repúblika (PR), Francisco Guterres Lú-Olo promulga ona Dekretu-Lei ne’ebé kria subsídiu ba profisionais ba atividade jornalístika, Husu hosi Governu ba fornesimentu notísias kona-ba surtu Covid-19 durante estadu emerjénsia (EE).

“Profisionais komunikasaun sosial (KM),  iha papél importante tebes tanba liu hosi sira-nia atividade jornalistika durante estadu emerjénsia kontribui ativamente ba divulgasaun informasaun kredivel no nesesáriu ba prevensaun no kombate pandemia iha territóriu nasionál”, Dehan PR Lu-Olo, liu hosi komunikadu Impressa, ne’ebé www.naunil.com. asesu liu Pagina Ofissial Prezindensia Repúblika, kinta, (30/12). 

Liu hosi atividade jornalístika profisionais komunikasaun sosial fó informasaun ne’ebé loloos hodi nune’e hatun ansiedade no prevene pániku iha populasaun nia le’et no  ikus mai kontribui hodi halo tuir regras estadu emerjénsia ninian.

Dezinformasaun ne’ebé mosu iha redes sosiais atu halo ema la fiar autoridade relasiona vasinasaun no kombate ba moras ne’e, papél jornalista importante tebes halo populasaun informadu no fiar ba medidas implementasaun estadu emerjénsia nian.

Papel jornalista nian ne’ebé identifikadu no husu espesifikamente hosi Governu tanba ne’e bele hetan rekompensa.

Subsídiu ne’e fó ba jornalista sira hare’e  ba rekoñesimentu risku ne’ebé profisionais orgaun KM hasoru durante hala’o atividade jornalístika iha pandemia Covid-19 nia laran.

Subsídiu ne’e sei fó ba jornalista sira ne’ebé dezenvolve atividade jornalístika ho Sala de Situasaun Sentru Integradu Jestaun Krize (SIJK) ka sira ne’ebé Governu husu ba produsaun notísia durante períodu entre 1 abril-31 dezembru 2021. Subsídiu sei sura loron traballu efetivu durante data ne’ebé temi iha leten.

Jornalista sira ne’e sei simu osan ho valór $5 ba kada loron efetivu traballu nian, Ministru Assuntu Parlamentares no Komunikasaun Sosial, (MapKoms), ho baze informasaun fornese hosi Sala SIJK ka hosi Diresaun Nasionál ba Diseminasaun Informasaun Ministériu Assuntus Parlamentares no Komunikasaun Sosial,  aprova lista profisionais  Ne’ebé dezenvolve atividade jornalístika priense kondisaun hatur iha artigu 1 husi Dekretu-Lei ne’ebé hateten katak, Subsídiu ba profisionais hala’o atividade jornalístika.

Tuir Lei númeru 5/2014, 19 Novembru, Lei KM, hamutuk ho Sala SIJK ka sira ne’ebé Governu husu ba produsaun notísias iha kondisoins direta ba espozisaun virus SARS-Covid-19 durante implementasaun estadu emerjénsia deklara tui-tuir malu hosi dekretu PR.

Dekretu-Lei ne’e aprova iha Konsellu Ministru (KM), iha 11 novembru 2021.*Jos