SABEH Rezista Moras Hamutuk 10.000
Naunil Media (Díli), Durante tinan 2021 nia laran Saúde Ba Ema Hotu (SABEH) rezista moras hamutuk 10.000 entre moras sira ne’e Ispa mak númeru aas liu.
“Iha tinan 2021 de’it ami rezista kazu hamutuk 10.000 (dez mill) kazu ne’ebé númeru aas liu infeksaun respiratoriu, depois tensaun alta, ran menus iha inan no oan depois isin katar ho tan moras balun en relasaun infeksaun respiratoriu”, dehan Diretór SABEH Andre Pereira Belo ba jornalista sira iha palásiu Prezidensiál Nicolau Lobato Bairru Pite, Kuarta kalan, (05/01).
Diretór SABEH ne’e hatutan durante servisu iha área remotas hotu-hotu iha Timor laran moras ne’ebé barak liu rezista mak moras infeksaun respiratoriu, Tuberkulozia, no moras ne’ebé mak afetadu ba pulmaun
“Ita mós iha moras barak ne’ebé durante ne’e ita nia komunidade sira moris ho ba maibé ladún hetan tratamentu di’ak hanesan tensaun alta ne’ebé durante ne’e lahetan tratamentu di’ak entaun SABEH ba iha ne’ebá halo tratamentu”, Tenik diretór SABEH.
Dr. SABEH ne’e hateten aleinde ne’e mós iha moras anemia hanesan ran menus iha inan feton sira ho tan labarik sira tanba kostume hahán ne’ebé nutrisaun ladún iha ou ai-han ne’ebé menus komunidade sira hetan iha sira nia família laran.
Andre esplika moras seluk mak hanesan isin katar depois iha tan lumbringa no mós iha moras seluk ne’ebé durante sira alista karik iha sanulu no sanulu resin.
Nia dehan, Durante ekipa SABEH halo kontinuasaun tratamentu ba komunidade sira mak Primeiru voluntariu sira identifika no halo ajenda regular nune’e voluntariu sira, kontinua halo tratamentu regular ba komunidade sira area remotas
Nunee SABEH mós servicu hamutuk ho postu saúde ho sentru saúde ne’ebé besik iha área refere, atu nune’e wainhira prezensa voluntariu SABEH sira laiha kolega saúde sira bele prienxe wainhira SABEH laiha ne’ebá.
Nia hateten, Durante ne’e sira husi palásiu Prezidente sira apoiu transporte apoiu mós Finansa uituan ba voluntariu sira, no mós nesesidade bázika hanesan han hemu no dala ruma palásiu Prezidente rasik oferese hahán ne’ebé sira presiza ba voluntariu sira, bainhira hala’o tratamentu iha komunidade nia leet.
Medikamentu sira ne’e SABEH hetan husi fatin tolu primeiru hetan husi SAMES, segundu voluntariu sira tau osan hamutuk no depois sira hola, terseiru dala ruma doasaun ruma ne’ebé mak hakarak apoiu entaun sira prefere liu mak ai-moruk.
Membru voluntariu ne’ebé dadaun ne’e iha Saúde Ba Ema Hotu (SABEH) hamutuk ema nain 125, kompostu husi médiku jerál no mós espesialista, Organizasaun SABEH kobre ona Munisípiu hotu-hotu hela de’it Oe-Cussi no Ataúru mak seidauk halo tratamentu.
Jornalista *Jos
editor Lop
