PR “Lú Olo” Dekreta Ona Loron Eleisaun Prezidensiál 2022/2027
Naunil Media (Díli), Prezidenti Repúblika (PR) Francisco Guterres “Lú OLo” liu hosi Dekretu númeru 2/2022, ne’ebé publika ohin iha Jornal Repúblika, marka ona data eleisaun prezidensiál nian hodi hili Prezidenti Repúblika ba períodu 2022-2027, iha loron 19 fulan-marsu 2022.
Bazeia ba artigu 12, númeru 1, hosi Lei númeru 7/2006, 26 dezembru (Lei Eleitorál ba Prezidenti Repúblika), ho alterasaun hirak ne’ebé mak halo ona ba lei ne’e, molok Prezidenti Repúblika dekreta data eleisaun prezidensiál, tenke rona uluk governu no mós partidu polítiku sira ho asentu iha Parlamentu Nasionál”, liu husi komunikadu ne’ebé Naunil Média asesu iha media Prezidensiál Repúblika nian iha Palásiu Prezidensiál Nicolau Lobato Bairru Pite, Sabadu (15/01/22).
Karik rezultadu eleisaun ne’e hatudu katak la iha kandidatu ida mak konsege hetan 50%+1 (metade ho votu ida tan), hosi númeru total votus válidus iha eleisaun ne’e, ita sei tuir fali eleisaun daruak.
Tuir artigu 12, númeru 2, hosi Lei Eleitorál ba Prezidenti Repúblika, eleisaun daruak sei halo iha loron tolu-nulu, sura hosi loron eleisaun dahuluk. Ba eleisaun daruak ne’e, sei la presiza ona iha tan dekretu prezidensiál ba markasaun loron eleisaun daruak nian.
Ba eleisaun ida ne’e, Prezidenti Repúblika rona ona governu, partidu polítiku hotu-hotu ho asentu iha Parlamentu Nasionál, Komisaun Nasionál Eleisaun (sigla iha lian-portugés CNE) no Sekretariadu Tékniku Administrasaun Eleitorál (STAE).
Nune’e mós tuir Konstituisaun Repúblika Demokrátika Timor-Leste (KRDTL) liu hosi artigu 86, alínea c), fó kbiit ba Prezidenti Repúblika marka data eleisaun prezidensiál no lejislativa.
Jornalista *Jos
Editór Lop
