CNE: Evita Insulta Malu Entre Kandidatura iha Kampana

Naunil Media (Díli), Comisão nacional das eleisoês (CNE) sei toma medidas para evita insulta maluk entre kandidatura prezidente  Repúblika (PR) iha tempu kampana ne’ebé hahú husi dia 2-16 fulan Marsu tinan ne’e.

Tuir vice prezidente CNE Domingos Barreto Informa, Kampana ne’ebé realiza iha dia 2-16, CNE sei toma medida iha tempu kampana para atu evita problema sira ne’e la bele mosu.

“Ami hakruk de’it ba lei, no ami sei la hakruk ba lideransa se de’it, i ba kandidatura se de’it, ne’ebé se mak viola lei mak iha ita nia leten no ita hotu hakruk ba lei, Konstitusaun, kodigu penal, no hakruk ba regulamentu sira ne’ebé mak iha”. Dehan vice prezidente CNE Domingos Barreto ba jornalista hafoin partisipa fitun dialogu iha salaun CNE, Sexta (11/02).

Vice prezidente CNE haktuir, ne’ebé kandidatu se de’it mak viola lei prosesu la’o nafatin.

“Preparasaun CNE nian halo ona liña kordenasaun ho polísia nasionál Timor leste (PNTL), oinsá mak bele implementa lei ne’e, i klaru ke krime ou aktu ruma akontese ita hare ninia rekezitus hanesan bahasa karik unsur-unsur krime ne’e halo nusa”, Katak nia.

Enkuantu ita iha regulamentu balu ne’ebé dekretu Govenu fo sai, no ita mós iha kodigu penal iha artigu 229 to’o artigu 243 ne’e ko’alia kona-ba krime eleitoral sira, dehan nia.

Nia hateten, Krime ne’ebé mak akontese iha faze kampana, votasaun, kontazem no faze apuramentu i transporta sasán sira ne’e mai fali iha nasionál.

“Liña kordenasaun ho ministeriu públiku ho tribunais ami halo daudauk ona, no iha dia 16 agora mós sei iha reuniaun ida ho komandante PNTL sira iha 12 Munisípiu inklui RAEOA iha Dili, atu nune’e bele halo preparasaun ne’ebé mak di’ak liu no kordenasaun ne’ebé mak di’ak liu antes dia 2 tama ba faze kampana”, Tenik nia.

Enkuantu krime eleitoral mak ko’alia kona-bá ema halo impedimentu ruma ou pertur no saida de’it, i no aktu ida ne’ebé halo iha tempu ida kampana no votasaun, ida ne’e regula hotu iha ita nia kodigu penal, nia hakotu. LTS