Komunidade Suku 4 Seidauk Asesu Elektrisidade, 75 Uza Ona Prepagu

Naunil Media (Bobonaro), Xefe Elektrisidade de Timor-Leste (EDTL) Munisípiu Bobonaru Mário de Jessus Soares, informa komunidade suku ha’at iha  Munisípiu refere seidauk assesu enerjia elektrisidade, tanba ne’e EDTL sei esforsu iha tinan ne’e (2022) hodi dada elektrisidade ba populasaub hotu-hotu bele sente naroman.

“Iha Munisípiu Bobonaru ne’e, suku ha’at ho nia aldeia neen nulu resin ha’at mak komunidade sira seidauk assesu ba liña elektrisidade, hanesan suku Geulai, Dau’udu, Ilatlau no Kuda, maibe tama ona iha pakote iha tinan ida ne’e tenki ser asessu hotu”, konfesa Mário ba www.naunil.com iha nia kna’ar fatin Maliana Villa, Sabadu (12/3).

Nia relata, EDTL munisípiu Bobonaru rejista kliente hamutuk rihun sanulu resin lima atus sia sia nulu resin sia no komunidade ne’ebe uza ona kontador prepargu hamutuk rihun sanulu resin ha’at liu atus rua resin mak uza kontador prépagu ne’ebe lao normal.

“Populasaun iha munisípiu Bobonaru pursentu ruanulu resin lima mak to’o agora seidauk uza kontador prepagu, maibe dirijentes EDTL munisípiu Bobonaru ne’e garante iha tinan ne’e sei esforsu atu nune’e komunidade bele uza kontador prepargu hodi kontribu reseitas ba estadu”, tenik xefe EDTL Bobonaro ne’e.

Nia alerta, “Hau orienta ona pesoal sira iha tinan ne’e bele monta hotu ona kontador prepargu, tanba buat ida ligasaun illegal ne’e fo impaktu tebes ba ita no mos iha lei ne’ebe sei regula ita kuandu ita uza ahi ilegal”.

Maske nune’e, nia dehan, dejafios ne’ebe sira hasoru iha terrenu mak transporte, ne’ebe sempre difikulta sira, tanba kareta ida mak avaria hela no halo hela manutensaun.

“Dadaun ne’e ami iha kareta tolu, maibe ida aat tiha no hela rua deit mak hodi uza ba hala’o servisu, no ida aat ne’e halo hela manutensaun iha Díli, maibe EDTL nasionál mós apoiu tan kareta ida mai ne’ebe ami sente suficiente ona ba ami”, tenik nia.

Antes ne’e mós EDTL munisipiu Bobonaru simu uluk motorizada hamutuk hitu maibe distribui ona ba pesoal sira iha postu administrativo lima no sentru Batugade nune’e pesoal sira bele fasilita hala’o servisu atendementu ba komunidade sira.

Total funsiunáriu eletrisidade de Timor-Leste munisípiu Bobonaru dadaun ne’e hamutuk ema nain rua nulu resin sia. Ana