SEKOMS Prontu Kolabora ho Ministeriu Saúde-CIGC Hodi Kombate HOAX
Naunil Media (Dili) Sekretáriu Estadu ba Komunikasaun Sosiál, Merício Juvinal dos Reis “AKARA”, sorumutu ho Diretór, Carlito Freitas, Sentru Integradu Jestaun Krize (CIGC-Sigla Portugés) José da Costa, hodi koalia kona-ba konbate hoax relasiona ho situasaun Covid-19.
Merício Juvinal dos Reis “AKARA”, afirma iha enkontru ne’e koa’lia oinsá maximiza partisipasaun media hodi kombate HOAX iha situasaun emerjénsia nune’e bele divulga informasaun sira ne’e ho efetivu no efikaz ba públiku.
“SEKOMS prontu kolabora tanba ida ne’e ita nia dever, ita tenki divulga informasaun ne’ebé kredivel ba sidadaun hotu liuliu konaba COVID-19, hodi Evita HOAX” tenik “AKARA” kinta-feira, loron 18 fulan-marsu tinan 2021, iha sala reuniaun SEKOMS, Palásiu Governu, Dili.
Governante ne’e realsa, koordenasaun servisu ida ne’e importante no ba oin tenke fó informasaun lolos ba sidadaun no husu ba sidadaun fó konfiansa nafatin ba Estadu no Governu hodi kontrola situasaun iha teritorio nune’e populasaun sira labele mate no hamlaha tanba COVID-19.
Entertantu Diretór Ministériu Saúde, Carlito Freitas, hatutan husi Ministériu Saúde liuliu iha pilares ne’ebé responsavel ba iha komunikasaun risku envolvimentu komunidade, durante ne’e iha difikuldade ba iha divulgasaun informasaun no liuliu informasaun COVID-19 nian no informasaun HOAX.
“Iha situasaun Ida ne’e ami labele hala’o servisu mesak, husu apoiu SEKOMS nune’e ba media sira seluk bele apoiu hodi hakman servisu ida ne’e hodi divulga informasaun liga ba COVID-19 inklui HOAX nebe’e espalha iha komunidade nia le’et” hateten nia.
Iha sorumutu ne’e akompaña husi Prezidente RTTL.EP, Prezidente TATOLI.IP, Asesora Juridika SEKOMS, Asesor Gabinete Primeiru Ministru, Xefe Gabinete SEKOMS no Diretór DNPDML.#NLO
