Kampaña Ikus, Naimori : “Deskulpa Ba Líder Nasionál Sira”
Naunil Media (Díli), Konseleiru Máximu Partidu Kmanek Haburas Unidade Nasionál Timor Oan (KHUNTO), José dos Santos Naimori “Bukar”, hateten ho hakraik-àn hato’o deskulpa ba líder nasionál sira hotu-hotu, relasiona kampaña Eleitoral prezidensial periodu 2022 – 2027, durante semana rua (03 – 16 Marsu).
Naimori kasu lia hirak ne’e, iha ambitu kampaña Eleitoral kandidatura PR, Armanda Berta dos Santos, bad ala-ikus iha Díli, Kuarta (16/03).
“Iha tempu polítika kampaña dala-ruma liafuan balun Kritika, ladun monu ba líder partidu sira hotu ne’ebé husi kandidatura nain 15. Lori família KHUNTO, ami nain rua husu deskulpa ba partidu hotu-hotu, liu maun Bo’ot Xanana, maun Lú-Olo, maun Lere, maun Rogerio Lobato, maun Alkatiri, no sira seluk labele temi ida por ida”, konfesa Naimori.
Tuir Naimori, maske iha diferensia polítika maibé nudar sidadaun timor oan ida presiza lideransa sira hotu atu hamutuk hodi serví nasaun.
“Ita Timor oan nafatin núdar lideransa ida ne’ebé atu servi ba povu presiza ita hotu-hotu hamutuk lolo liman ba malu atu lori jerasaun foun no povu sira nia moris hakmatek ho saudavel”, dehan nia
Ikus, nia dehan, estrutura Partidu KHUNTO husi lorosa’e to’o loromonu husu deskulpa ba lider sira hotu durante iha tempu kampaña. Ana
