Lú Olo: Harii Estadu Direitu Demokrátiku Hahú No Define iha Konstituisaun
Naunil Media (Dili), Kandidatu Prezidente Repúblika periodu 2022-2027 Francisco Guterres “Lú Olo” ho númeru sorteiu (6) hateten, Timor-Leste (TL) foin hetan independensia ema rihun mak lori ran hodi sosa, tanba ne’e harii estadu direitu demokrátiku hahú no define iha Konstituisaun.
“Ha’u hakarak hateten ba imi hotu katak Independensia Timor-Leste nian foin konkista ema rihun mak lori nia ran hodi sosa, no liu husi sira ne’ebé mak moris harii estadu ida bolu dehan estadu de direitu Demokrátiku ne’ebé hahú iha Konstituisaun no mós define iha Konstituisaun rasik no forma Organizasaun no poder polítiku kona-bá difikuldade sira ne’ebé mak halo ha’u konkore para atu bele ezerse polítika ida ne’e”, dehan Kandidatu númeru sorteiu 6 bainhira hala’o Debate públiku ne’ebé organiza husi CNE, iha Salaun Novu Turizmu, Lecidere, Tersa kalan, (15/03).
Lú Olo mós profunda vizaun karik re-eleitu nu’udar xefí estadu mak atu hametin estadu direitu demokrátiku la’o tuir konstituisaun no lei sira, halo vizaun ida ne’e hanesan Prezidente Repúblika tuir konstituisaun de’it ne’ebé fó ba xefí estadu, tanba separasaun poder buka nafatin halo separasaun no halo koperasaun di’ak ho orgaun soberania sira, Prezidente Repúblika bele haree fila fali lei no lei oan sira, ne’ebé mak aprova husi Parlamentu Nasionál tantu husi Governu tenke haree didi’ak.
Aktual Prezidente Repúblika ne’e mós hateten karik re-eleitu nu’udar xefí estadu dala ida tan mak sei hametin nafatin paz no establidade, no mós hala’o knaar tuir de’it lei no Konstituisaun Repúblika Demokrátika Timor-Leste (KRDTL), no lei oan sira.
Nune’e mós kandidatu Prezidente Repúblika Rogeiro Tiago Lobato hateten razaun kandidata aan ba Prezidente Repúblika, tanba hakarak Timor-Leste iha rekonsiliadu liberdade no mós estadu ida ne’ebé forte no mós defende Timor-Leste ida ne’ebé mak dezenvolvidu.
“Ha’u hakarak Timor-Leste ida rekonsiliadu liberdade, ha’u hakarak estadu ida forte demokratiko, rekonsiliasaun ne’ebé la’os de’it polítika, maibé rekonsiliasaun ida sai furak hodi defende mós Timor-Leste ida ne’ebé mak dezenvolvidu”, katak Rogeiro Lobato.
Rogeiro Lobato hatutan, Karik Eleitu sai Prezidente Repúblika misaun ida mak sei halo buat hotu atu garante liberdade no garante unidade nasionál, no sai Prezidente Repúblika ida ne’ebé mak indepedente iha nia desizaun konsoliador, nune’e rezolve diferensia entre Timor-oan sira ho ezilente ida bele sai hanesan ponte intendimentu entre forsa polítika partidaria, no defende konstituisaun, garante establidade polítika governativa atu bele halo dezenvolvimentu sosiu ekonomiku ne’ebé lalais no efikasia. *Jos
