STAE Konsidera Informasaun iha UNTL La Loos

Naunil Media (Dili), Diretór Jerál Sekretáriu Tekniku Administrasaun Eleitoral (STAE), Acilino Manuel Branco, konsidera Informasaun ne’ebé publika husi Universidade Nasional Timor Lorosa’e (UNTL) hoax ou laloos.

“Informasaun ne’e la’os husi STAE, ne’e husi parte irresponsabilidade balu, alias mai husi UNTL, fakuldade ekonomia i kestaun ne’e la’os STAE mak fó sai, tuir loloos labele fó sai, porque Informasaun sira ne’ebé mak relasiona ho prosesu eleitoral, se mak iha kompetensia atu fó sai maka orgaun organizasaun eleitoral, STAE ho CNE rua ne’e de’it,” nia afirma iha ninia kna’ar fatin, kaikoli, kinta (17/03).

Nia sublina, Atu dehan de’it ba parte sira ne’ebé mak fó sai Informasaun sira liga ho eleisaun ninian, ne’e laloos, no fontes ne’e la’os kredibel, tanba sira la’os instituisaun ida ne’ebé mak ho sira ninia atribuisaun, hodi bele organiza eleisaun.

Refere ba iha asuntu iha semana kotuk, atu dehan katak, STAE fo sai tiha ona nune’e, sei eziste sentru votasaun paralelu tolu iha Dili, ho ninia numeru eleitores ne’e hamutuk 4030 eleitores, sira sei ba vota iha sentru votasaun tolu hanesan, Baukau, Vikeke, Lautem sei vota iha sentru votasaun STM Bekora, Manatutu, Aileu, Ermera, Liquiçá no Atauru, vota iha GMT Díli, no Ainaru, Bobonaru, Manufahi, Kovalima no RAEOA sei vota iha Inap Komoro.

Portantu preparasaun iha terrenu maximu la’o masimu teb-tebes, i to’o iha loron 19 fulan ne’e, sira ne’ebé rejista ona, no dadus iha ona STAE, ho numeru ne’ebé mensiona ona, sei ba vota iha sentru votasaun paralelu. Agora ba sira ne’ebé mak ba rejistu, maibé naran la tama iha STAE, sira tenke fila ba vota iha sira nia suku, mais la’os kansela hanesan informasaun ne’ebé mak fó sai iha media sira.

“Atu infoma, Parte sira ne’ebé mak fó sai informasaun laloos hanesan ne’e, sira la iha responsabilidade, no hanesan tentativu ida atu impede ema, hodi la bele ba vota, ne’e kuandu ita liga ba Lei, ne’e krime, nune’e hau husu ho atensaun ba parte hotu-hotu, por-favor labele fo sai Informasaun sira ne’ebé mak la’os faz parte ba ita boot sira nia area responsabilidade, tanba ida ne’e ami halo ona kantaktu ba UNTL, atu bele husu diskulpa, no hasai tiha Informasaun laloos, ne’ebé sira fó sai iha media, sei sira la husu diskulpa, hau sei foti medida ruma”,  nia relata.

Nia sublina, Ne’e fó impaktu bo’ot ba eleitores sira, tanba eleisaun bainrua de’it ona, komesa ohin no aban, ema hotu-hotu sei halo reflesaun, ida-idak hakmatek iha ninia fatin ho konsiensia hodi bele deside ninia mehi iha loron 19 fulan ne’e, sei alerta sira ho Informasaun hanesan ne’e, halo ema sai panik.

Agora ho Informasaun falsu sira ne’e, depois ema kestiona ba iha UNTL, sira prontu ka lae atu responsabiliza, ho informasaun sira fó sai, hanesan universitariu, atu hasai Informasaun ne’e, tenke konfirma no Informasaun sira ne’ebé mak iha responsabilidade, la’os ita alerta ema ho informasaun sira, hodi halo sira sai paniku, i prekupa sira ninia diretu ne’ebé mak sira preparadu ona atu ba ezerse iha loron 19 fulan ne’e, dehan nia.

Antes nia hakotu, sidadaun ne’ebé mak rejista ona iha sentru votasaun paralelu, ita bo’ot sira prepara ona kartaun eleitoral, hodi ba vota iha fatin sira ne’ebé mak mensiona. LTS