Falur: Portu Hera Sai Preokupasaun Ba Forsa Armada

Naunil Media (Díli), Xefí Estadu Maiór General das Falintil Forsa Defeza Timor-Leste (F-FDTL), Tenente General Falur Rate Laek hateten, Portu Hera sai preokupasaun ba forsa armada, tanba ne’e nia hato’o ba Prezidente Repúblika (PR) nu’udar komandante Supremu.

Tenente General Falur Rate Laek hato’o lia hirak ne’e ba jornalista sira hafoin enkontru semanal ho Prezidente Repúblika (PR) Francisco Guterres “Lú Olo” iha Palásiu Prezidensiál Nicolau Lobato Bairru Pite, kuarta (30/03).

“Ne’e Preokupasaun Forsa Armada nian ne’ebé ohin ha’u hato’o ba Prezidente Repúblika,  nu’udar Komandante Supremu, parte Austrália sira hadia zona B ne’e komesa hadia ateru ba ona leten no aas ona, parte iha governu ne’e seidauk mas horseik ministru hateten iha ona prosesu tenderizasaun nia laran,  para atu ba halo buat ne’e, ita tauk liu ponte ida antigu ne’e ain sabelok tiha tohar agora dala ida Ró ahi rua ne’e nia lori tun ba uut to’o tama tasi kidun”,  dehan Tenente General Falur Rate Laek.

Tenente General hatutan, to’o tinan 2023 Portu Hera ne’e finaliza ou lae ne’e so prátika mak ko’alia, tanba kona-ba dezenu no konseitu ba konstrusaun refere iha ona maibé dalaruma to’o prátika akontese fali buat seluk.

“Ne’e so prátika mak be ko’alia, ha’u labele ko’alia ita dezena tiha konseitu ba konstrusaun iha ona,  mas iha prátika ne’e dalaruma akontesementu ruma bele mosu fali iha laran, ita lakonsege saida mas teorikamente ema define ne’e,  konklui iha tempu ne’ebé hala’o buat ruma,” katak Tenente General.

Falur Rate Laek hateten,  Rekursu umanu ba operasional Ró rua ne’ebé atu mai ne’e preparadu ona, ekipa sira ne’ebé mak atu ba iha tiha treinu iha Austrália ne’ebá,  halo akompañamentu iha ne’ebá nafatin ne’ebé laiha problema,  espesialidade hotu-hotu iha laran ne’ebé laiha problema no membru lubuk ida mak iha ne’ebá mas liu nain tolu nulu (30).*Jos