Horta: Manan ka Lakon Dezisaun Husi Povu
Naunil Media (Díli), Kandidatu Prezidente Repúblika ho númeru sorteiu 1 José Manuel Ramos Horta hateten, Konsidera no respeitu desizaun povu tomak nian hodi prontu simu lakon ho manan iha eleisaun segundu ronde.
“Ha’u pronto para manan ,pronto para lakon ne’e desizaun iha povu Timor-Leste, tuir direitu universal hanesan kandidatu prontu kualker desizaun husi povu”, dehan kandidatu Presidente Repúblika númeru 1 ba jornalista sira iha sentru votasaun suku Metiaut, tersa (19/04).
Nia hatutan, Respeita no hakruk povu Timor- Leste ne’ebé soberanu ezerse direitu sidadaun kada tinan lima hodi hili sira nia prezidente repúblika ida ne’ebé reprezenta duni nasaun ne’e, ba mundu no sai aman ba povu, neutralidade ba partidu polítika hotu ne’ebé asentu iha parlamentu nasionál no la asentu iha parlamentu.
Nia dehan, See manan karik, agradese ba povu tomak, agradese ba maun boot Xanana Gusmão, partidu CNRT ho partidu hotu-hotu ne’ebé apoiu on ho movimentu oi-oin no grupu arte marsial no rituais hotu ne’ebé apoiu ona ha’u.
Ko’alia ho partidu hotu inklui FRETILIN para ba oin ita servisu hamutuk, hodi garante estabilidade paz iha rai ida ne’e, nia argumentu.
Respeita organizasaun arte marsial ho arte rituais sira hotu ne’ebé kontribui estabilidade paz iha rai ida ne’e, katak nia.
Observasaun Naunil Média.com nota iha sentru votasaun suku Metiaut kandidatu númeru sorteiu 1 ne’e marka ona nia prezensa iha sentru votasaun ne’e tuku 7:00 hodi ezerse nia direitu votu,husi observador internasional Uniaun Europea, CNE ho STAE no hetan mos seguransa másimu husi PNTL. Ana
