Lú Olo: Lakon Ka Manán Rezultadu Mak Determina

Naunil Media (Díli), Prezidente Repúblika (PR), nuudar mós rekandidata nia-àn ho númeru sorteiu 2, Francisco Guterres “Lú Olo” hateten, Lakon ka manán rezultadu mak sei determina tanba demokrásia mak hanesan ne’e duni.

“Ha’u garante ida ne’e mós hanesan hodi bainhira ha’u hateten ona, rezultadu mak sei determina, demokrásia mak hanesan ne’e duni lakon ka manán,” dehan Xefí estadu Francisco Guterres “Lú Olo” ba jornalista sira hafoin tuir votasaun segunda volta iha sentru votasaun EBC númeru 01 Farol, Tersa (19/04).

Aktual PR ne’e mós husu ba povu Timor-Leste vota ba Prezidente Repúblika, tanba ne’e nia apelu ba sidadaun hotu-hotu ba sentru votasaun hodi hili Xefí estadu.

“Ohin ha’u mai vota no husu mós ba povu Timor-Leste tomak vota ba Prezidente Repúblika, ha’u mai apelu ha’u halo tiha ona i hateten tan dala ida ba povu ida ne’e, agora dadaun mai iha sentru votasaun para atu hili ninia Prezidente Repúblika”,  katak aktual PR “Lú Olo”.

Lú Olo hateten,  Karik re-eleitu sai Prezidente Repúblika ba povu tomak no kumpri de’it komprimisiu tomak atu bele koopera ho orgaun soberania sira seluk para atu bele garante paz, estabilidade no dezenvolvimentu.

Kandidatu númeru sorteiu 2 ne’e esplika paz no estabilidade ne’e la’o hamutuk nafatin ho iha momentu ida agora dadaun ne’ebé mak povu fó no sei garante ba povu para la’o hamutuk hodi garante ida ne’e.

Nia dehan, karik la eleitu hanesan sidadaun sempre kontribui nafatin saida mak bele para rai ne’e ba oin liu husi komprimisiu ne’ebé hateten ona, maibé fiar katak saida mak kompromete ba povu sei kumpri tuir de’it ida ne’e. *Jos