Marí La Admite Militante Sobu Paz no Estabilidade
Naunil Media Díli), Sekretáriu Jerál Partidu Frente Revorsionariu Timor-Leste Independensia (FRETILIN), Marí Alkatiri la admite militante sira atu sobu paz no estabilidade, tanba Fretilin hakarak kontinua dezenvolvimentu hodi fó benefisia povu.
“Militante hatene ona katak ha’u la admite sira atu sobu paz no estabilidade, militante Fretilin hatene ona ida ne’e, Fretilin nia hakarak manán para atu kontinua prosesu dezenvolvimentu para atu bele fó benefisiu ba povu,” dehan Sekjer Partidu Fretilin Marí Alkatiri ba jornalista sira hafoin tuir votasaun segunda volta iha sentru votasaun EBC númeru 01 Farol, Tersa (19/04).
Sekjer Partidu Fretilin ne’e mós hakarak hamutuk ho Xanana atu ko’alia no fiar katak Xanana sei resposta tanba loron hirak antes sira nain-2 preokupa hotu ba servisu kampaña nune’e sira seidauk kontaktu malu.
“Ha’u la presiza Horta, ha’u hakarak hamutuk ho Xanana ami nain-2 mak sei ko’alia, ha’u fiar ke hetan resposta husi Xanana purke foin loron hira ne’e, agora loron hira ne’e nia preokupa ho servisu ba kampaña ha’u mós servicu ba kampaña purtantu ami la kontaktu malu,” katak Sekjer Partidu Fretilin.
Iha fatin hanesan Prezidente Repúblika Francisco Guterres “Lú Olo” nu’udar mós kandidatu Prezidente Repúblika periodu 2022-2027 ho númeru sorteiu 2 hateten karik re-eleitu sai Prezidente Repúblika ba povu tomak no kumpri de’it komprimisiu tomak atu bele koopera ho orgaun soberania sira seluk para atu bele garante paz, estabilidade no dezenvolvimentu.
Nia dehan, Paz no estabilidade ne’e la’o hamutuk nafatin ho iha momentu ida agora dadaun ne’ebé mak povu fó no sei garante ba povu para la’o hamutuk hodi garante ida ne’e. *Jos
