MAPKOMS Keixa Jornalista, TLPU Konsidera Tristeza Bo’ot ba Liberdade Imprensa

Naunil Media (Díli), Liu husi komunikadu imprensa iha Taibesi, Kinta (26/05) ne’e, Timor-Leste Porta voz Press Union (TLPU),  Zezito da Silva, konsidera Ministru Francisco Martins da Costa Pereira Jerónimo ne’ebé halo keixa hasoru jornalista ne’e, tristeza boot ba Liberdade Imprensa tanba ministériu ida ne’e mak ho kompeténsia no responsabilidade atu garante independénsia média nian no independénsia órgaun komunikasaun sosiál atu hametin Estadu direitu demokrátiku.

Nia hatutan, TLPU mós sente triste ba keixa ne’e tanba mosu iha momentu ne’ebé Timor-Leste nia índise Liberdade Imprensa ne’e hetan di’ak hosi 71 ba 17, ne’ebé loloos Timor Leste sente orgullu, maibé iha momentu hanesan ministériu kompetente ne’e uza kódigu penál hodi kriminaliza servisu jornalizmu nian.

“Hafoin TLPU rekolla dadus no analiza obra ka notísia ne’ebé públika iha Hatuta. Com priénxe duni lei komunikasaun sosiál  iha artigu 2 no kódigu dentolojia jornalista nian, tanba ne’e;

Tuir lei komunikasaun sosiál artigu 20 ° ne’ebé define kona-bá dever jerál katak jornalista tenke sai kontrolu sosiál. Bazea bá preseitu hirak-ne’e liuhosi meiu komunikasaun sosiál HATUTAN.COM liuhosi nia jornalista, editór no Xefe Redasaun ho naran : Francisco Belo Simões da Costa, halo publikasaun bá kazu projetu instalasaun Set-top Box / Desodificador Rádiu Televizaun Timor Leste Empreza Públiku (RTTL , E.P ) ne’ebé deskonfia envolve husi Ministru MAPKOMS, Francisco Martins da Costa Pereira Jerónimo”, relata atual Sekretáriu Jerál TLPU ne’e.  

Nune’e, TPLU hanesan organizasaun ne’ebé halo advokasia makas ba Liberdade Imprensa sente triste ho asaun Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo ne’ebé halo keixa hasoru jornalista Hatutan.com Francisco Belo Simões da Costa ba “Denúncia Caluniosa” tuir kódigu penál artigu 285.

Dauluk, TLPU husu ba Ministru Francisco Martins da Costa Pereira Jerónimo atu ho fuan boot dada hikas fali nia-keixa ne’ebé hatoo ba Ministériu Públiku hodi fó garantia ba Liberdade Imprensa ne’ebé konsagra ona iha Konstitusaun Repúblika Demokrátika Timor-Leste.

Rua, TLPU mós husu ba MAPKOMS atu uza direitu resposta ho baze ba Lei Komunikasaun Sosiál artigu 2 iha aliña F katak “Direitu hodi halo loos”, direitu ba ema singulár ka koletivu ida-idak hodi halo loos notísia ne’ebé publika ka fó-sai faktu be laloos kona-ba nia.

Tolu, TLPU mós husu MAPKOMS atu hatoo informasaun ne’e ba Konsellu Imprensa Timor-Leste atu halo mediasaun hodi hetan solusaun ne’ebé justu no tuir dalan demokrásia nian.

Dahaat, ikus liu TLPU husu ba Públiku tomak katak Jornalista ne’e la’ós krime, tanba ne’e bainhira sidadaun sente katak servisu jornalizmu iha buat ruma la loos, Lei Komunikasaun Sosiál nian iha atu rezolve no halo mediasaun la’ós lori kódigu penál akuza jornalista tanba de’it ninia obra jornalístika. Mj3