Trade Invest ho MDF Asina Akordu Desiminasaun Informasaun ba IQTL, MTCI no Exportadores
Naunil Media (Díli), Kinta (26/05) ne’e, iha Hotel Timor, Trade Invest asina akordu ba daha’at (4) ho Market Development Facility (MDF) atu hametin no kontinua servisu hamutuk hodi fahe informasaun ba Institutu Qualidade de Timor-Leste (IQTL), komersiu externu Minesteriu Turizmu Comersiu i Industria (MTCI) no Emprezariu Investor sira atu digitalija setor publiku no privadu kona ba komersiu no exportasaun.
IQTL no komersiu externu MTCI fo hanoin ba seitór privadu liu-liu exportadores atu komprende diak Guvernu nia prosesu no bele halo tuir regulamentu, liu husi exportadores halo dialogu ho Guvernu kona ba tekniku, esperensia no obstakulu ne’ebe sira hasoru bainhira halo exportasaun.
Diretor Ezekutivu Trade Invest, Arcanjo da Silva, hateten presija aumenta exportadores no produtus ne’ebe exporta ba rai liur hodi kompete iha Merkadu Tradisional no merkadu Global.
“Ami nia misaun atu fasilita investidor no exportador sira hodi hala’o negosiu iha Timor-Leste no kna’ar prinsipal mak fo informasaun ne’ebe relevante ba oportunidade, dezafiu no aktividade Investimentu no exportasaun”, dehan Arcanjo da Silva.
Iha fatin hanesan, Drew Johnson, hateten MDF fo apoiu ba exportador sira atu desenvolve diak liu tan.
“Ami apoiu exportador sira atu desenvolve diak no deversifika ekonomia rai laran”, tenik Diretor MDF.
Ikus-Nia, hateten ho akordu tekniku foun nee, MDF no Trade Invest sei servisu hamutuk nafatin hodi hatan ba dejafius ne’ebe hasoru husi empreza Timor oan sira. Mj2
