MD Filomeno: Taur, Lere Labolu Amérika Mai Halo Baze Iha Baucau

Naunil Media (Díli), Ministru Defeza (MD), Filomeno da Paixão de Jesus hateten, Primeiru Ministru (PM) Taur Matan Ruak, General reformadu Lere Anan Timur, ho MinisteIriu Defeza la bá bolu Amérikanu sira mai halo baze iha Baucau, maibé atu ajuda no dezenvolve komponente Aero.

Lia hirak ne’e hato’o husi Ministru Defeza Filomeno da Paixão de Jesus  ba jornalista sira hafoin   enkontru ho Prezidente Repúblika (PR), José Manuel Ramos Horta iha Palásiu Prezidensiál Nicolau Lobato Bairru-Pite, kuarta (01/06).

“General Taur, General Lere ho Ministru Defeza la bá bolu Amérikanu mai halo baze iha Baucau, mai para ajuda komponente ita nian atu dezenvolve ita nia komponente aero, para bele oferese sesna ida ho ekipamentu vizilansia nian kompletu, para bele servisu hamutuk ho partrolla rua mai husi Austrália mai iha tinan oin, sira konbina malu para iha tasi ne’e ita bele kontrola kosta súl ne’e di’ak laiha tan buat ida”, dehan MD

Membru guvernu ne’e hatutan, Iha enkontru ne’e mós xefe estadu mós hateten halo kooperasaun di’ak ho estadu no países bo’ot, no hakiak nafatin kooperasaun di’ak hodi haruka nafatin Timor oan sira ba kursu no mós estuda.

“Prezidente Repúblika hateten halo kooperasaun didi’ak estadu sira iha li’ur haree ba país sira boot hanesan ne’ebé fó apoiu ba ita ne’e liuliu ba estadu Amérikanu, estadu Chines, estadu Australianu, estadu Portugés hakiak nafatin Koperasaun di’ak ho sira haruka nafatin ita nia ema ba kursu ba estuda i tuir dutrina i tuir protokolu ne’ebé ita estabelese ita implementa para kooperasaun ne’e sai di’ak liu tan,” tenik membru guvernu ne’e. * Jos