Suíça Disponivel Apoiu Kualker Projetu Iha TL

Naunil Media (Díli), Embaixador Suíça Kurt Kuns hateten,  Suíç iha disponibilidade apoiu sosiedade Timor-Leste (TL), no apoiu kualker projetu hodi hadia kondisaun moris ema nian ne’e tenke sustentavel.

“Ami disponkbel atu apoiu sosiadade Timor-Leste iha área sira ne’ebé importante ba nasaun, no depende ba inisiativa sira ne’ebé mai husi sosiedade sivil, Timor-Leste ha’u sempre ko’alia katak ami prontu apoiu kualker projetu hodi hadia kondisaun moris ema nian,  ne’ebé tenke sustentavel ita labele implementa de’it projetu ida depois futuru laiha kontinuasaun no la fó benefisiu”,   dehan Diplomata Suíç ne’e ba jornalista sira hafoin enkontru ho Prezidente Repúblika PR José Manuel Ramos Horta iha Palásiu Prezidensiál Nicolau Lobato Bairru-Pite, kinta, (02/06).

Diplomata ne’e argumenta,  Sira lakohi implementa projetu ne’ebé asina de’it iha sura tahan leten ou tau de’it iha gaveta tanba ne’e estraga osan

“Ha’u mós lakohi implementa projetu sira ne’ebé asina de’it iha sura tahan no tau iha gaveta,  ida ne’e estraga de’it osan, ami mós kontaktu iha ne’e no dala ruma liu husi vizita sosiédade sivil nian mai Timor-Leste hodi diskute no hatene RoadMap”,  katak Diplomata

Kurt Kuns hatutan,  Enkontru ho PR Diplomata ne’e mós informa katak Suíça sai mós kandidatu ida ba Membru Konsellu Seguransa ONU, no eleisaun sei akontese iha 9 Juñu semana oin, no mós ko’alia kona-bá projetu ne’ebé governu Suíça liu husi Embaixada apoiu ba Timor-Leste, iha ne’ebé sira mós iha relasaun di’ak no esperiénsia di’ak ho sira nia parseiru no sira koñese di’ak sosiédade sivil, ne’ebé sempre komprimetidu no mós ba iha futuru sei hadia di’ak liu tan ema nia kondisaun ne’ebé importante liu mak edukasaun.

“Iha ne’ebé ami halo hala’o hela projetu balun no mós apoiu ba RoadMap kona-bá prevensaun tortura ida ne’e mak ami nia komprimisiu importante, ne’ebé ami halo ba Timor Leste no mós nia vizaun ba tinan lima mai, no mós projetu sira ne’ebé presija halo diskusaun iha futuru”, tenik Kurt Kuns

Nia mós haksolok no fó parabens ba Prezidente Repúblika, tanba iha vitória ou mana iha eleisaun prezidensiál no mós fó parabens ba povu Timor-Leste ba eleisaun prezidensiál ne’ebé la’o ho hakmatek.

Nia dehan,  Sira mós akompaña debate Prezidente Repúblika la’o animadu, no sira ko’alia mós kona-ba valor ne’ebé ho Suíça ho Timor-Leste, fahe ba malu hanesan demokrásia, direitu umanus, estadu direitu, sustentabilidade, paz no seguransa enjerál.

Embaixador Suíça ne’ebé rezidente iha Jakarta, Indonézia ne’e hateten ida ne’e ba dala tolu ona vizita Timor-Leste, haksolok tebes bele mai iha ne’e no iha relasaun amizade ne’ebé di’ak tebes. *Jos