Aban PR Horta Sei Loke Abertura Ba Selebrasaun Loron Mundiál Oceano

Naunil Media (Díli), Aban Prezidente Repúblika (PR), José Manuel Ramos Horta sei loke abertura ba selebrasaun loron mundiál Oceano, ne’ebé realiza iha Fakuldade Enginaria UNTL Hera.

Lia hirak ne’e hato’o husi Dosente Departamentu Peskas no Siénsia Mariña Mário Marques Cabral ba jornalista sira hafoin enkontru ho PR iha Palásiu Prezidensiál Nicolau Lobato Bairru-Pite, tersa (07/06).

“Ami nia objetivu ohin mai hasoru Prezidente Repúblika, atu Konvida Prezidente Repúblika aban ba halo abertura ba selebrasaun loron mundiál Oceano, ne’ebé sei realiza aban, iha auditoriu fakuldade enginaria UNTL Hera, Prezidente Repúblika konfirmadu ona aban sei ba partisipa eventu refere,  hanesan hato’o mós palestra fó hanoin ba atividade ne’ebé universidade sei hala’o”,  dehan Dosente Departamentu Peskas Mariña Mário Marques Cabral.

Dosente ne’e hatutan, Importante ba semináriu ne’e mak hanesan fanu ema nu’udar nasaun membru ba ONU nian,  ne’ebé hanesan iha mundu hotu-hotu selebra loron importánsia Tasi ba umana, tanba hatene katak Tasi ne’e hanesan regulador anin ba ema nia moris no mós regula klima.

“Bainhira ita ko’alia kona-bá mudansa klimatika ninia importante ida mak nia knaar bo’ot Tasi, depois liga mós ba viodiversidade ne’ebé moris iha ne’ebá, maibé agora ne’e destrutivu atividade barak iha ne’ebá entaun polusaun barak ne’ebé ita hotu ba futuru, hanesan nasaun joven ita nia esperansa katak ba futuru ita mós hanesan bele kontribui ba mundu inaternasional”, katak Dosente

Nia esplika,  atividade ne’ebé sira halo tiha ona mak hanesan, limpeza jerál iha Tasi ibun komesa husi Metiaut to’o Kristu Rei, ne’ebé servicu hamutuk mós ho Ministru Agrikultura no Peskas, Ministru Turizmu Komérsiu Industria, inklui mós Parseiru dezenvolvimentu sira ne’ebé eziste ona durante ne’e iha iha Timor-Leste.

Orador semináriu ne’e mak hanesan Ministru Turizmu Komérsiu Industria, ho topiku mak turizmu Maritima iha Timor-Leste, Sekretáriu Estadu Peskas Liga ba dezenvolvimentu peskas industria iha Timor-Leste, no mós orador husi Feto kona-bá oinsá involvimentu Feto iha área peskas.

Liga ba despeza sira ne’e mai husi Universidade sira husi depertamentu peskas, no siénsia Mariña fakuldade Agrikultura UNTL, no mós bele dehan katak orsamentu ne’ebé gasta ba semináriu ne’e mais ou menus 2.000 Mil ba leten ne’e ba atividade prinsipál sira. *Jos